Japonııada Qazaqstannyń týy kóterildi
ASTANA. KAZINFORM – QR Saýda jáne ıntegratsııa mınıstri Arman Shaqqalıev bastaǵan qazaqstandyq delegatsııa EXPO 2025 Osaka dúnıejúzilik kórmesinde Qazaqstannyń Ulttyq kúni aıasyndaǵy is-sharalarǵa qatysty.
EXPO National Day Hall alańynda mınıstr A.Shaqqalıev pen Osaka EXPO 2025 qaýymdastyǵy ókilderiniń qatysýymen Qazaqstan Respýblıkasynyń týyn kóterý rásimi ótti.
Arman Shaqqalıev Japonııa úkimetine jáne kórmeni uıymdastyrý komıtetine joǵary deńgeıde daıyndyq pen qonaqjaılylyq úshin alǵys aıtyp, sharanyń qazaqtyń uly oıshyly Abaı Qunanbaıulynyń 180 jyldyǵyna oraı uıymdastyrylǵanyn atap ótti.
«Bul – óńirlerdiń geografııalyq qashyqtyǵyna qaramastan, rýhanı jaqyndyǵymyzdy bildiredi. Bizdi dástúrler men aǵa býynǵa degen qurmet, bilim men eńbekke degen joǵary mán biriktiredi», – dedi mınıstr.
Ol sondaı-aq 1991 jyldan beri Qazaqstan men Japonııa arasynda saýda, ınvestıtsııa, ǵylym, bilim, ekologııa jáne tehnologııa salalarynda turaqty yntymaqtastyq damyp kele jatqanyn atap ótti.
Japonııanyń ekonomıka, saýda jáne ónerkásip vıtse-mınıstri Akıesı Kato óz sózinde mádenı almasýdyń ózara túsinistik pen ekijaqty baılanystardy nyǵaıtýdaǵy rólin atap ótip, Qazaqstannyń Ulttyq kúnimen quttyqtady.
EXPO aýmaǵynda qazaqstandyq balýan, tórt dúrkin álem rekordshysy Sergeı Tsyrýlnıkov, ulttyq kıimdegi ártister men batyrlar qatysqan sherý ótti. Keshkisin Expo Hall Shining Hat sahnasynda Dına Nurpeıisova atyndaǵy akademııalyq halyq aspaptary orkestri, Sarmad jáne Art Dombyra ansamblderi, opera solısteri Zarına Altynbaeva men Altynbek Ábilda, «Birlik» ansambli jáne basqa da ártisterdiń qatysýymen kontsert uıymdastyryldy. Sharany shamamen 3 myń kórermen tamashalady.
Sonymen qatar kórme aýmaǵynda Astana qalasy men Ulytaý óńiriniń ınvestıtsııalyq jáne týrıstik áleýetin tanytatyn stendter qoıyldy. Qazaqstandyq pavılonǵa kelýshiler sany 900 myńǵa jetti.
Aıta keteıik, Japonııada jer silkinisinen keıin bes kıt jaǵaǵa shyǵyp qaldy.