Japonııada Qazaqstan qatysatyn V Azııa Para oıyndarynyń ashylý saltanaty ótti
ASTANA. KAZINFORM — Búgin, 18 qazanda Japonııanyń Nagoıa qalasynda qurlyqtaǵy eń iri sporttyq dodalardyń biri – V Azııa Para oıyndarynyń saltanatty ashylý rásimi ótti.
Jarystyń resmı bastalýy jarııalanyp, sportshylardyń júlde jolyndaǵy básekesi 24 qazanǵa deıin jalǵasady. Japonııa Azııa Para oıyndaryn óz tarıhynda alǵash ret qabyldap otyr.
Jarysqa Azııanyń 45 eli men aýmaǵynan 4000-ǵa jýyq sportshy men komanda ókili qatysady dep kútilýde. Oıyndar baǵdarlamasyna 18 sport túri engen.
Qazaqstan atynan 12 sport túrinen 150 parasportshy baq synaıdy. Olar para jeńil atletıka, para dzıýdo, para júzý, para paýerlıftıng, para taekvondo, para velosport, para nysana kózdeý, para sadaq atý, para ústel tennısi, arbadaǵy tennıs, otyryp oınaý voleıboly jáne bochcha boıynsha júldelerge talasady.
Ashylý saltanatynda Qazaqstannyń Memlekettik týyn ustap shyǵý mártebesi Parıjdegi 2024 jylǵy Paralımpıada oıyndarynyń qola júldegeri, Azııa Para oıyndarynyń chempıony Dastan Muqashbekov pen paradzıýdodan álem chempıonatynyń kúmis júldegeri Aıala Merekege berildi.
Bıylǵy Azııa Para oıyndary Qazaqstan úshin tarıhı oqıǵamen erekshelenedi. Elimizdiń atynan alǵash ret zııatkerlik damýynda erekshelikteri bar úsh sportshy parajeńil atletıka men paraústel tennısinen baq synaıdy. Qazaqstan osy sanattaǵy sportshylaryn Azııa Para oıyndaryna qatystyrǵan Ortalyq Azııadaǵy alǵashqy memleket atanady.
Negizgi jarystar Nagoıa qalasy men Aıchı prefektýrasyndaǵy sport nysandarynda ótedi. Ashylý jáne jabylý saltanattary Mizuho Park Athletic Stadium stadıonynda uıymdastyrylady.
V Azııa Para oıyndary 24 qazanda aıaqtalady
