Japonııada qaza tapqandar arasynda qazaqstandyqtar joq - SІM
ASTANA. QazAqparat - Japonııada nóser jańbyr men laı kóshkini saldarynan 179 adam qaza tapty. Aldyn ala derek boıynsha, zardap shekkender men mert bolǵandar arasynda Qazaqstan azamattary joq, dep habarlaıdy QazAqparat tilshisi SІM-ne silteme jasap.
Jergilikti BAQ-tyń habarlaýynsha, adam ólimi kóp tirkelgen mundaı tabıǵı apat Kúnshyǵys elinde sońǵy 30 jylda bolmaǵan.
«Japonııadaǵy tabıǵı apattan mert bolǵandar men joǵalǵandar sany artyp keledi. Onda Qazaqstan azamattarynyń mert bolýy nemese joǵalý týraly faktiler tirkelgen joq. Áıtse de, Qazaqstan konsýldary túgendeý jáne anyqtaý jumystaryn júrgizip jatyr», - dep habarlady QR Syrtqy ister mıınstrliginiń resmı ókili Aıbek Smadııarov.
Aıta keteıik, beısenbiden bastap Japonııanyń batys bóliginde shilde aıyndaǵy qalypty jaýyn-shashyn kóleminen úsh ese kóp jańbyr jaýǵan. Eki mıllıon adam ózenniń arnasynan shyǵyp, tasýyna baılanysty evakýatsııalanýǵa májbúr boldy. Qaza tapqandardyń kóbi Hırosıma prefektýrasynda tirkelgen.
9 shilde kúni Memleket basshysy Nursultan Nazarbaev Japonııanyń Premer-Mınıstri Sındzo Abege kóńil aıtý jedelhatyn joldady.
«Tabıǵı apat saldarynan jaqyndaryn joǵaltqan jáne zardap shekken otbasylardyń, sondaı-aq búkil Japonııa halqynyń qaıǵysyna ortaqtasyp, kóńil aıtamyn», - delingen jedelhatta.
