Japonııada qalyń qar túsýi saldarynan 140-tan astam reıs toqtatyldy
TOKIO. QazAqparat – Japonııanyń áýe kompanııalary eldiń soltústigindegi Honsıý araly men Japon teńiziniń jaǵalaýynda qalyń qar túsýi saldarynan kem degende 143 ishki reısti toqtatty. Bul týraly QazAqparat NHK telearnasyna silteme jasap habarlaıdy.
Kestedegi ózgerister negizinen Tokıo, Osaka sııaqty iri qalalar jáne soltústiktegi prefektýralar arasyndaǵy baǵyttarǵa qatysty bolyp otyr. Qalyń qar jaýýy saldarynan «sınkansen» ekspresteriniń birneshe jelisinde qozǵalys jyldamdyǵy shektetilgen. Sondaı-aq keshke ońtústik-batysta ornalasqan Kıýsıý aralyndaǵy magıstraldardiń biri jabylatyny týraly habarlanǵan.
Qalyń qar túsýi saldarynan Ivate prefektýrasynda bir er adam qaza tapty. Traktormen qar ysyrǵan ol ańdamaı ózenge qulap ketken.
Japonııada birneshe kún boıy qalyń qar jaýyp tur. Sınoptıkterdiń boljamynsha, 2 qańtar tańyna qaraı Japonııa teńiziniń jaǵalaýynda qalyńdyǵy 1 metrge deıin qar túsýi múmkin.
