Japonııada qabyǵy sýda erıtin ekologııalyq taza otshashý ázirlendi
ASTANA. KAZINFORM — Japonııadaǵy otshashý óndirýshi kompanııa Rıýkoký ýnıversıtetiniń ǵalymdarymen birlesip, sýǵa erıtin qabyqpen qaptalǵan ekologııalyq taza otshashý ázirledi, dep habarlaıdy Kyodo.
Mundaı qabyqtar ushyrylǵannan keıin bir táýlik ishinde tolyq erip ketedi. Sonyń arqasynda merekelik otshashýdan keıin qalatyn qoqys kólemi aıtarlyqtaı azaıady.
Jańa tehnologııany Sıga prefektýrasyndaǵy Kakinoki Fireworks Industry Co. kompanııasy professor Takahıko Nakaokımen birlesip ázirlegen. Jobanyń maqsaty — otshashýdyń qorshaǵan ortaǵa tıgizetin keri áserin azaıtý.
Dástúrli otshashýlar qaǵaz qabyqqa oralǵan birneshe qabat oq-dáriden turady. Jarylystan keıin qabyq bólshektenip, jerge nemese sýǵa túsedi. Kádimgi kraft-qaǵazdyń tolyq ydyraýyna shamamen 6 aı qajet.
Zertteýshiler qabyqtyń bir bóligin sýǵa erıtin shaıyrmen almastyrýdy usynǵan. Synaq nátıjesi kórsetkendeı, dıametri shamamen 12 santımetr bolatyn standartty otshashýdyń qabyǵy qolaıly jaǵdaıda kelesi kúni-aq tolyq erip ketedi.
Óndiriste tuqym qabyqtary men topyraqqa arnalǵan qospalardy jasaýǵa qoldanylatyn bıoydyraıtyn shaıyr paıdalanylady. Ázirleýshilerdiń aıtýynsha, bul materıal tiri aǵzalar úshin qaýipsiz jáne qorshaǵan ortaǵa zııan keltirmeıdi.
Sý tıgen qabyq jumsaryp, qyzdyrylǵan kámpıtke uqsas kúıge keledi. Al aǵyndy sý bar ózenderde ol bir táýlik ishinde tolyqtaı erip ketedi.
Kakinoki Fireworks Industry Co. kompanııasy 25 jyldan beri ekologııalyq taza otshashýlardy ázirleýmen aınalysyp keledi. Buǵan deıin óndirýshi basqa da bıoydyraıtyn materıaldardy synaqtan ótkizgen, alaıda mıkroplastık túzilý qaýpine baılanysty olardan bas tartqan.
Professor Takahıko Nakaokımen birlesken jumys 2018 jyly bastalyp, nátıjesinde jańa sýǵa erıtin qabyq jasaldy.
Kompanııa prezıdenti Hıroıýkı Kakınokıdiń aıtýynsha, bıyl kásiporyn shamamen 20 myń otshashý shyǵarýdy josparlap otyr. Onyń jartysy jańa ekologııalyq tehnologııa boıynsha óndiriledi.
Aıta keteıik, Atyraýda kólik ishinen otshashý atqandar qamaýǵa alyndy.
