Japonııada ǵarysh arpasynan qaınatylǵan syra satylýda
ASTANA. Jeltoqsannyń 4-i. QazAqparat - Japondyq «Sapporo» kompanııasy reseılik ǵaryshkerlerdiń kómegimen orbıtada ósirilgen arpadan qaınatylǵan syrany Internet arqyly sata bastady,
dep habarlaıdy «Maıak» radıosy. Fırma osynaý qaıyrymdylyq sharadan túsken tabystyń bárin bilim salasyna jáne jer orbıtasyn ıgerýdi nasıhattaýǵa aýdarýǵa ýáde berip otyr.
Jobaǵa Reseıdiń Ǵylym akademııasy men japondyq Okaıama Ýnıversıteti qatysýda. Osy eki joǵary oq ornynyń kómegimen Halyqaralyq ǵarysh stansasyna jóneltilgen arpa tuqymy reseılik modýlde jarty jylda kishigirim ónim bergen. Orbıtada bolyp kelgen arpadan Jerde jańa astyq ósirilip, sodan syra qaınatylyp otyr.
Satylymǵa alty shólmekten salynǵan 250 qorap syra shyǵarylyp otyr. Ár qoraptyń baǵasy- 10 myń ıendi quraıdy, bul 110 dollardyń shamasynda. Satylymǵa shyǵarylmas buryn, syra zerthana janýarlaryna berilip tekserildi, odan keıin kompanııa qyzmetkerleriniń qatarynan shyqqan eriktiler ony synaqtan ótkizdi. Olar «Sapporo ǵarysh arpasy» dep atalǵan syrany maqtap otyr.
