Japonııada ǵalamshardaǵy eń egde er adam 112 jasynda ómirden ozdy
ASTANA. QazAqparat - Japonııada seısenbi kúni ǵalamshardyń eń egde turǵyny ıAsýtaro Koıde kóz jumdy. Bul týraly Nagoıa qalasyndaǵy ol em alǵan aýrýhana ókilderi habarlady.
Onyń ómirden ozýyna sebep bolǵan - sozylmaly júrek derti. Ol 1903 jyly 13 naýryzda Fýkýı prefektýrasynda Tsýrýga qalasynda dúnıege kelgen. Nagoıaǵa 107 jasynda qonys aýdarǵan. Ómiriniń sońyna deıin qarttyń densaýlyǵy syr bere qoımaǵan, tipti kózildirik te kımegen. Ótken jyldyń sońynda onyń otandasy Sakarı Momoı 112 jasynda qaıtys bolǵannan soń ol ǵalamshardaǵy eń egde adam dep tanyldy.
Statıstıka derekterine sáıkes Japonııada 80 jastan asqan adamdar sany ult tarıhynda alǵash ret 10 mıllıonnan asqan.
