Japonııada emotsııaly robottardyń satylymy bastaldy - VIDEO
ASTANA. QazAqparat - Japonııada gýmanoıdty Pepper robottarynyń synamaly toptamasynyń satylymy bastaldy. Bul robottar jan-jaǵyndaǵy adamdardyń emotsııalaryn sezinip, olarǵa áreket etýge qabiletti eken.
Sheteldik BAQ-tyń jazýynsha, testilik toptamadaǵy 200 danasy lotereıa boıynsha ony qurastyrýshylar men baǵdarlama jasaýshylardyń arasynda úlestiriledi. Olardyń eskertýleri eskerilgenen keıin, Pepper 2015 jyldyń aqpanynan bastap resmı túrde saýdaǵa shyǵarylady.
Robot jan-jaǵyndaǵy adamdardyń emotsııalaryn taný úshin kóptegen datchıktermen jabdyqtalǵan. Androıdtyń basyna túrli tústi eki kamera jáne úsh ólshemdi lazerli datchık ornatyldy.
Ony qurastyrýshylardyń paıymynsha, Pepper dúkenge kelýshilerge qyzmet kórsetýge laıyqty qurylǵy. Adamnyń emotsıonaldyq jaǵdaıyn baıqaǵannan keıin, ol ózindegi algorıtm arqyly klıenttiń qyzyǵýshylyǵyn týdyrǵan zatyn anyqtap, taýar ornalasqan jerge deıin alyp barady.
Qajet bolǵan kezde ol taýarǵa túsinikteme berip, usynystar jasaı alady. Jappaı óndiristiń aldynda qurastyrýshylar robotty ózin-ózi jetildiretin qyzmetpen jabdyqtamaq. Bul óz kezeginde Pepper qoǵamdastyǵyna bultty júıede birlesken tájirıbeni jınaqtap, ótken qatelikterge jol bermeýdiń amaldaryn jasaýǵa múmkindik beredi.
Robottyń boıy - 1,2 metr, salmaǵy - 28 keli. Akkýmýlıatordyń qýaty toqtaýsyz 12 saǵatqa jetedi. Búginde Pepper 1930 AQSh dollaryna baǵalanyp otyr.
