Japonııada eldi mekenge kirip ketken aıý dárimen óltirildi
ASTANA. KAZINFORM – Japonııanyń soltústik-shyǵysyndaǵy Mııagı prefektýrasynda turǵyn aýdanǵa kirip ketken uzyndyǵy shamamen 1,5 metrlik aıý birneshe saǵat boıy jasyrynyp júrip, keıin arnaıy dáriniń áserinen ólip qaldy, dep habarlaıdy KyodoNews agenttigi.
Sendaı qalasynyń bıligi turǵyndardan túsken birneshe habarlamadan keıin tańǵy saǵat 9 shamasynda dron arqyly aıýdyń bar ekenin rastady. Jergilikti bılik ony tuzaqpen ustaýǵa tyrysqanymen, esh nátıje bermegen.
Qala ákimdigi aıýlarǵa qarsy atys qarýyn qoldanýǵa múmkindik beretin «shuǵyl atý» sharasynan bas tartyp, janýardy aldymen tynyshtandyratyn dárimen (trankvılızator) qozǵalyssyz qaldyrǵan. Keıin keshki saǵat 19:30 shamasynda aıýdyń joıylǵany habarlandy.
Oqıǵa bolǵan jer Sendaı qalasynyń Aoba aýdanynda, ákimdik ǵımaratynan shamamen 600 metr soltústikke qaraı, saýda ortalyqtaryna jaqyn ornalasqan. Polıtsııa aýmaqty qorshaýǵa alyp, arnaıy kúzet qoıyp, kún batqanda jaqyn mańdaǵy joldardy japqan.
22 jastaǵy stýdent Reto Ýehara tańǵy saǵat 6 shamasynda patrýl kóliginiń saqtyqqa shaqyrǵan daýysynan oıanǵanyn aıtyp, «mundaı jaǵdaıdyń qalanyń dál ortasynda bolǵanyna sený qıyn» ekenin jetkizdi.
Juma kúninen beri osy aýdanda aıý kórindi degen birneshe habarlama túsken, boljam boıynsha, bul sol janýar bolýy múmkin.
Japonııada sońǵy ýaqytta aıýlardyń eldi mekenderge shyǵý jáne adamdarǵa shabýyl jasaý jaǵdaılary jıilegen. Qorshaǵan orta mınıstrliginiń málimetinshe, aqpan aıyn qosa eseptegende sońǵy 11 aıda el boıynsha aıý baıqalǵan shamamen 50 myń jaǵdaı tirkelgen. Bul kórsetkish 2024 qarjy jylyndaǵy jyldyq deńgeıden eki eseden asa joǵary.
Eske sala ketsek, byltyr qarashada Japonııanyń taýly aımaǵynda aıý talaǵan áıel qaza tapqanyn jazdyq. Eki kúnnen keıin el áskeri sol mańdaǵy aıýlarmen kúresýge kómekke keldi.
Al jýyrda Katonqaraǵaıdaǵy aıýlar qysqy uıqydan turdy.