Japonııada el namysyn qorǵaǵan sportshylar júldeli oraldy
ASTANA. KAZINFORM — Astana turǵyndary Japonııa astanasy Tokıoda tórt jylda bir ret ótetin dúbirli doda — Sýrdlımpıada oıyndarynda sýrdo dzıýdodan el namysyn qorǵaǵan elorda sportshylaryn áýejaıdan qarsy aldy. Bul týraly qala ákimdiginiń resmı saıty habarlady.
Jeńimpaz sportshylar — Ámına Faızýlına men Sabyrjan Hapızovty Astana qalasynyń Dene shynyqtyrý jáne sport basqarmasynyń basshysy Vasılıı Levıttiń ózi arnaıy qarsy aldy.
— Jarysqa eki shákirtimiz qatysty. Aramyzda qyzdar arasynan alǵashqy tarıhı chempıonymyz bar. 17 jasar qyzymyz Ámına Faızýlına jeke birinshilikten chempıon boldy. Al komanda birinshiliginde kúmis júldege ıe boldy. Ekinshi shákirtimiz Sabyrjan Hapızov aýyr salmaqta kúresti. Ol osymen ekinshi olımpıadasynda qola júlde alyp otyr. Ol komanda birinshiliginde altyn júldeger atandy. Sonymen Astanaǵa 2 altyn, 1 kúmis, 1 qola syılap otyrmyz. Tokıodada jarys joǵary deńgeıde ótti. 80-deı memlekettiń sportshylary dzıýdoda baq synasty. Osy jarysta qazaq sportshylary sensatsııa týdyrdy. Dittegen maqsattarymyzdy júzege asyryp keldik, — dedi QR Eńbek sińirgen jattyqtyrýshysy, sportshylardyń jeke bapkeri Bolat Danııarov.
Aıta keteıik, 15-26 qarasha aralyǵynda Japonııanyń astanasy — Tokıoda XXV Sýrdlımpıada oıyndary ótip jatyr. Estý qabileti zaqymdanǵan sportshylar arasynda tórt jylda bir ótetin dúbirli doda bıyl erekshe tarıhı mánge ıe — Sýrdlımpıadalyq qozǵalystyń 100 jyldyǵymen tuspa-tus keldi. Bıylǵy oıyndarda 81 elden 3000-ǵa jýyq sportshy qatysyp, 21 sport túrinen 209 dıstsıplına boıynsha baq synap jatyr. Astana qalasynyń atynan el namysyn 4 sport túrinen (sýrdo dzıýdo, sýrdo ústel tennısi, sýrdo taekvondo, sýrdo júzý) 5 sportshy qorǵap jatyr.
Eske salaıyq, qazaqstandyq sportshylar Islam yntymaqtastyǵy oıyndarynda 56 medal jeńip aldy.