Japonııada demografııalyq quldyraý 45 jyl qatarynan jalǵasyp keledi
ASTANA. KAZINFORM – Japonııada 2026 jylǵy 1 sáýirdegi jaǵdaı boıynsha balalar sany 13,29 mln adamdy qurap, bir jyl ishinde 350 myńǵa azaıdy, dep habarlaıdy Kyodo News.
Bul – baqylaý júrgizilgen búkil kezeńdegi eń tómengi kórsetkish. Mundaı derekti eldiń Іshki ister jáne kommýnıkatsııalar mınıstrligi keltirdi.
15 jasqa deıingi balalardyń jalpy halyq sanyndaǵy úlesi 10,8%-ǵa deıin tómendedi – bul da 1950 jyldan bergi eń tómengi deńgeı. Kórsetkishtiń tómendeýi qatarynan 45 jyl boıy jalǵasyp keledi. Balalar sany eń joǵary deńgeıge 1954 jyly jetip, 29,89 mln adamdy quraǵan.
Týý kórsetkishiniń tómendeý úrdisi jas qurylymynan da baıqalady: 12–14 jas aralyǵyndaǵy balalar sany 3,09 mln bolsa, 2 jasqa deıingi sábıler nebári 2,13 mln. 2025 jyly dúnıege kelgender sany taǵy bir tarıhı mınımýmǵa – 705 809 adamǵa jetip, bul kórsetkish onynshy jyl qatarynan azaıyp otyr.
Japonııa úkimeti 2030 jylǵa deıingi kezeńdi «úrdisti ózgertýge berilgen sońǵy múmkindik» dep jarııalap, balaly otbasylardy qarjylaı qoldaýdy keńeıtip keledi. Alaıda qabyldanǵan sharalarǵa qaramastan, balalar sanynyń azaıýy toqtar emes.
United Nations derekterine sáıkes, halqy 40 mln-nan asatyn 38 eldiń ishinde Japonııa balalar úlesi boıynsha sońynan ekinshi orynda tur. Sońǵy orynda – Ońtústik Koreıa (10,2%).
Aıta keteıik, buǵan deıin qytaılardyń qartaıyp bara jatqanyn jazdyq. Aldaǵy 10 jylda 60-tan asqandar sany Qytaıda 400 mln-nan asatyny boljanyp otyr.
