Japonııada belgisiz bireý dárethanada tabıǵı apattan zardap shekkender úshin 130 myń dollar qaldyryp ketken
ASTANA. 29 qyrkúıek. QazAqparat - Belgisiz bireý japonııalyq Saıtama prefektýrasy Sakado qalasy ákimshiliginiń dárethanasynda jer silkinisi men tsýnamıden zardap shekken Tohoký aýdanynyń turǵyndaryna berý ótinishimen 10 mln. ıen (130 myń dollardan astam) qaldyryp ketken.
Qala ákimshiligi habarlaǵandaı, «Men - jalǵyz basty adammyn. Myna aqshany Tohoký turǵyndaryna berýlerińizdi ótinemin» degen jasyryn hat pen ishine aqsha salynǵan qapshyq ótken beısenbide tabylǵan, dep habarlaıdy Vigmir.net.
Aqshanyń jartysy bank qaǵazymen oralǵan, soǵan qaraǵanda olar jaqynda ǵana esep-shottan alynǵanǵa uqsaıdy. Qapshyqtyń ishinen sondaı-aq tabıǵı apattan zardap shekkenderge qaıyrymdylyq kórsetýge shaqyratyn úndeý hat ta tabyldy.
Sakadonyń ákimshiligi sál kúte turýdy uıǵardy. Eger jomart azamat tabylmaı, aqshasyn keri qaıtarýdy talap etpeıtin bolsa ǵana olar japonııalyq Qyzyl krestke aýdarylatyn bolady.
