Japonııada «Bavı» taıfýnyna baılanysty júzdegen áýe reısi toqtatyldy
ASTANA. KAZINFORM – Japonııanyń ońtústiginde soqqan qýatty «Bavı» taıfýnyna baılanysty dabyl jarııalandy. Tabıǵı apat saldarynan 12 adam zardap shegip, júzdegen áýe reısi toqtatyldy. Bılik sý tasqyny men kóshkin qaýpi týraly eskertý jasady, dep habarlaıdy TASS.
Aldyn ala málimet boıynsha, zardap shekkenderdiń basym bóligi ushqan zattardyń soqqysynan jeńil jaraqat alǵan nemese daýyldy jelden qulap qalǵan. Mııako kýrorttyq aralynda eki týrıst qyzdy teńiz tolqyny alyp ketkenimen, olar jaǵaǵa óz kúshterimen shyǵyp, túrli jaraqat alǵan.
Taıfýn aımaǵyndaǵy jeldiń jyldamdyǵy sekýndyna 40 metrden asyp, keı jerlerde ekpini 55 metrge deıin jetedi. Mundaı jel jeńil avtokólikti aýdaryp jiberýge qaýqarly. Qazirgi ýaqytta «Bavı» taıfýny saǵatyna shamamen 25 shaqyrym jyldamdyqpen Qytaı jaǵalaýy baǵytyna qaraı soltústik-batysqa jyljyp barady.
Daýyl nóser jańbyrmen qatar júrip jatyr. Sınoptıkterdiń boljamynsha, 12 shilde tańyna deıin óńirde táýligine 250 mıllımetrge deıin jaýyn-shashyn túsýi múmkin. Japonııa bıligi turǵyndardy sý basý jáne kóshkin júrý qaýpinen saq bolýǵa shaqyrdy.
Qolaısyz aýa raıyna baılanysty Okınava araly men oǵan irgeles araldardyń áýejaılarynda 220 áýe reısi toqtatyldy. Mııako aralynda elektr energııasyn berý júıesinde aqaýlar tirkelip, kóshedegi keıbir baǵdarshamdar jumysyn toqtatty. Sondaı-aq barlyq paromdar men teńiz kóliginiń qozǵalysy ýaqytsha toqtatyldy.
Eske sala keteıik, buǵan deıin AQSh-tyń Los-Andjeles okrýgindegi «Sammıt» orman órti bir táýlikte shamamen 650 gektar aýmaqty sharpyp, bılik birneshe aýdan turǵyndaryn evakýatsııalaý týraly sheshim qabyldaǵan bolatyn.
Aıta ketelik Tynyq muhıtynan Japonııaǵa qaraı qaýipti taıfýn jaqyndap keletini týraly jazǵan edik.
