Japonııada bala týý kórsetkishi sońǵy 100 jylda bolmaǵan deńgeıge tómendedi

TOKIO. QazAqparat - Japonııada 2022 jyly týǵan balalar sany 800 myńǵa azaıdy. Bul 1899 jyldan beri tirkelgen eń tómen kórsetkish, dep habarlaıdy QazAqparat KYODO NEWS silteme jasap.

Japonııa densaýlyq saqtaý mınıstrligi taratqan aldyn ala málimet boıynsha, 2022 jyly jańa týǵan nárestelerdiń jalpy sany 5,1 paıyz tómendep, 799 728 adamdy qurady. 2017 jyly elde bala týý kórsetkishi 2033 jyldan bastap ǵana 800 myńnan tómen túsedi dep boljanyp kelip edi.

Sarapshylar eldegi bala týý kórsetkishiniń tómendegenin uzaq ýaqytqa sozylǵan COVID-19 pandemııasynan týyndaǵan ómir saltyn ózgertý jáne adamdardyń kesh úılený nemese múldem úılenbeýi sebep ekenin aıtýda.

«Buǵan sondaı-aq kóptegen kúrdeli faktorlar, sonyń ishinde jastar arasyndaǵy qarjylyq qaýipsizdik jáne áleýmettik baılanystyń az bolýy da sebep», - dedi Japonııanyń Densaýlyq saqtaý, eńbek jáne áleýmettik qamtamasyz etý mınıstrliginiń ókili.

Premer-mınıstr Fýmıo Kıshıdanyń ákimshiligi eldegi demografııalyq jaǵdaıdy barynsha jaqsartý úshin «buryn-sońdy bolmaǵan» sharalar qabyldamaq. Ony naýryz aıynyń sońyna deıin jarııalaıdy.

Eske salsaq, QazAqparat tilshisi Ońtústik Koreıadaǵy demografııalyq jaǵdaıdyń nasharlaǵany týraly jazǵan bolatyn.