Japonııada aıýlardyń adamdarǵa shabýyly rekordtyq deńgeıge jetti

ASTANA. KAZINFORM — Qyrkúıek aıynda Japonııada aıýdyń adamdarǵa shabýyly sońǵy on jyldaǵy eń joǵary kórsetkishke jetti, dep habarlaıdy Belta. 

Ótken aıda jyrtqysh ańnan 39 adam zardap shekken. Mamandar bul sońǵy 10 jyldaǵy eń joǵary kórsetkish ekenin aıtady.

Elde sáýir aıynan qyrkúıek aıynyń sońyna deıin aıýdan 109 adam zardap shegip, onyń beseýi qaıtys boldy. Qazan aıynyń alǵashqy aptasynda aıýlar 17 adamǵa tap bergeni anyqtaldy. Onyń bireýi jyrtqysh ańnyń shabýylynan qaza tapty. Al kúni keshe ǵana Gýnma prefektýrasynda aıý sýpermarketke kirip, eki adamdy jaraqattady.

Sarapshylar aıýdyń shabýylyn aımaqtardaǵy dándi-daqyldardyń egistigimen baılanystyrady. 

Mundaı aıýlar óz elimizde de turǵyndardyń záresin aldy. Qazir Shyǵys Qazaqstan jáne Abaı oblysynda turǵyndar ashyqqan aıýlardan úreılenip otyr.