Japonııada aıýdyń adamǵa shabýyly kóbeıgendikten olardy qaıta sanaý bastaldy
ASTANA. KAZINFORM – Japonııanyń Qorshaǵan orta mınıstrligi maýsym aıynda eldiń soltústik-shyǵysyndaǵy Tohoký óńiri men oǵan irgeles aýmaqtardaǵy aıýlar sanyn qaıta esepteýdi bastaıdy, dep habarlaıdy Kyodo News agenttigi.
Taý aımaqtaryna shamamen 800 fototuzaq ornatylady.
Kameralar men ózge de baqylaý tásilderi Tohokýdaǵy Aomorı, Akıta, Ivate, ıAmagata, Mııagı jáne Fýkýsıma prefektýralaryndaǵy, sondaı-aq kórshiles Nııgata prefektýrasyndaǵy qara aıýlardyń sanyn anyqtaýǵa múmkindik beredi. Zertteý nátıjeleri kelesi jyldyń basynda jarııalanady dep josparlanyp otyr.
Mundaı sanaq júrgizýge adamdarǵa jasalǵan aıý shabýyldarynyń kúrt kóbeıýi sebep bolǵan. 2026 jylǵy naýryzǵa deıingi bir jyl ishinde rekordtyq kórsetkish tirkelip, 238 adam zardap shekken nemese qaza tapqan.
Aıýlarǵa qarsy sharalar jónindegi mınıstrler keńesinde usynylǵan málimetke sáıkes, sáýir aıynda Tohoký óńirinde byltyrǵy osy kezeńmen salystyrǵanda aıýlar kóbirek baıqalǵan.
Eldiń ózge óńirlerin zertteý 2027 qarjy jylyna josparlanǵan.
Qońyr aıýlar mekendeıtin soltústik Hokkaıdo aralynda bılik janýarlardyń júnin jınaý ádisin qoldanbaq. Sondaı-aq Sıkoký aralyndaǵy az sandy qara aıý popýlıatsııasyn zertteý kózdelgen.
Al kórshiles Kıýsıý aralynda zertteý júrgizilmeıdi, óıtkeni ol jerde aıýlar joıylyp ketken dep esepteledi.
Japonııa úkimetiniń málimetinshe, qazirgi ýaqytta Tohoký óńirinde 19 myńnan astam qara aıý, al Hokkaıdoda shamamen 11 600 qońyr aıý bar.
Eske sala ketsek, byltyr Japonııa áskeri aıýlarmen kúresýge kómektesip jatqanyn jazdyq. Sebebi olardyń adam talap óltirý oqıǵasy jıilep ketken.
Al jaqynda Jońǵar Alataýynda qońyr aıý kútpegen qylyq jasaǵanyn jazdyq.
