Japonııada artyq jumys isteýge tyıym salyndy
NUR-SULTAN. QazAqparat - «Kópshiligi japondardyń eńbekqor halyq ekenin aıtady. Japonııanyń eńbek naryǵynda artyq jumys isteý dástúr sanalatyn. Endi Japonııa úkimeti alǵash ret artyq jumys isteý ýaqytyn resmı túrde qysqarta bastady», - dep jazady huanqiu basylymy.
Avtordyń aıtýynsha, úlken býynǵa qaraǵanda qazirgi jastar jumysty birinshi orynǵa qoımaı, kóbine jeke ómirge nazar aýdaratyn bolǵan.
«2015 jyly «Dentsý» kompanııasynyń qyzmetkeri Matsýrı Takahası óz ózine qol jumsaǵannan keıin búkil memleket boıynsha jumys ýaqytyn qysqartý qolǵa alyna bastady. 2017 jyly Japonııa parlamenti resmı túrde jumys tártibin ózgertý týraly joba qabyldady. Qujatta artyq jumystyń qansha ýaqytqa sozylýyna ruqsat beriletinine deıin jazylǵan. Mınıstrler sheshimimen aıyna 45 saǵat, jylyna 360 saǵattan artyq jumys ýaqytynan tys kezderi jumysta otyrýǵa tyıym salynǵan. Bul erejelerdi buzǵan basshylyqqa alty aıǵa deıin qamaý nemese 300 myń ıenge deıin aqshalaı aıyppul taǵylǵan. Bul japon úkimeti engizgen alǵashqy zańdy shekteý boldy», - dep jazady basylym.
Bıylǵy jyldyń 1 sáýirinen bastap bul ereje barlyq iri kompanııalarǵa da mindettelgen.
«Bul shara adamdarǵa ómirdiń raqatyn sezinýge kóbirek múmkindik berý úshin jasalyp otyr. Sonymen qatar bul ózgeristerden bólek Japonııa úkimeti 2017 jyly aqpan aıynda «sapaly juma» sharasyn qolǵa alǵan bolatyn. Oǵan sáıkes ár aıdyń sońǵy jumasynda jumys ýaqyty 15:00 aıaqtalyp, qyzmetkerlerge dúkenge baryp ózderine qajetti dúnıeler alýǵa ruqsat berilgen», - delingen aqparatta.
Statıstıka derekteri kórsetkendeı, «sapaly jumaá engizilgennen keıin dúkende satyp alýshylar 70%, al satylym 50% ósken.
