Japonııada árbir ekinshi áke bala kútimine baılanysty demalys alady
ASTANA. KAZINFORM — Japonııada alǵash ret er azamattardyń jartysynan astamy bala kútimine baılanysty demalysty paıdalanǵan. 2025 qarjy jylynda olardyń úlesi 50,9%-ǵa jetti, dep habarlaıdy Kyodo.
Japonııanyń Densaýlyq saqtaý, eńbek jáne ál-aýqat mınıstrliginiń málimetinshe, bul kórsetkish aldyńǵy jylmen salystyrǵanda 10,4 paıyzdyq tarmaqqa ósip, osymen 13 jyl qatarynan artyp otyr.
Ósim úkimettiń ákelerdi bala kútimine baılanysty demalys alýǵa yntalandyrý sharalarynyń nátıjesi sanalady. Atap aıtqanda, ákeler úshin bosanǵannan keıingi bala kútimine arnalǵan demalys baǵdarlamasy qoljetimdi bola tústi.
Er adamdar arasynda eń jıi tańdalǵan demalys merzimi — bir aıdan úsh aıǵa deıin (30,3%). Al áıelderdiń basym bóligi (31,4%) 12 aıdan 18 aıǵa deıingi merzimge bala kútimine baılanysty demalys alǵan.
Japonııa úkimeti 2030 jylǵa qaraı ákelerdiń bala kútimine baılanysty demalys alý deńgeıin 85%-ǵa jetkizýdi maqsat etip otyr.
Buǵan deıin Japonııada 2025 jyly týý kórsetkishi tarıhı eń tómengi deńgeıge túskeni habarlanǵan bolatyn.
Sondaı-aq Qazaqstanda ákelerdiń dekrettik demalysta bolǵan kezeńi zeınetaqy taǵaıyndaý kezinde eńbek ótiline esepteletini týraly jazǵan edik.
Al Qazaqstanda er azamattarǵa bala kútimine baılanysty demalysty qalaı rásimdeýge bolatyny jáne jumys berýshi bas tartqan jaǵdaıda ne isteý kerektigi týraly materıalymyzdan bile alasyz.
