Japonııada aptap ystyq saldarynan bir aptada 7,4 myń adam aýrýhanaǵa tústi
ASTANA. QazAqparat - Japonııanyń kóp bóliginde oryn alǵan aptap ystyq saldarynan bir aptanyń ishinde 7,4 myń adam aýrýhanaǵa jetkizildi.
Japonııanyń órtke qarsy kúzet basqarmasy 20-26 shilde aralyǵyndaǵy málimetterdi keltirip ótti, dep jazady RIA «Novostı».
Aptap ystyqtan zardap shekkenderdiń eń kóp sany Tokıo prefektýralarynda tirkelgen - munda 827 adam aýrýhanaǵa jetkizildi, Saıtamada - 721 adam, Tıbada - 522 adam, Kanagavada - 515 adam, Aıtıde - 465 adam jáne Osakada - 300 adam zardap shekken. Olardyń arasynda birneshe ondaǵan bala da bar.
Ótken aptada eń joǵary temperatýra jeksenbi-dúısenbi kúnderi tirkeldi. Birqatar prefektýralarda kún 39 gradýsqa deıin ystyq bolǵan.
Meteorologtardyń boljamynsha, seısenbi, 28 shilde kúni Tokıo, Osaka jáne Kıotoda aýanyń temperatýrasy 33 gradýsqa deıin kóteriledi, Kıýsıý aralynda kún 34 gradýsqa deıin ysıdy, al Fýkýsıma prefektýrasynda 32 gradýstaı ystyq bolady. Aýa temperatýrasynyń joǵarylaýyna baılanysty meteorologtar adamdardy salqyndatqysh quraldardy paıdalanyp, dalada uzaq ýaqyt bolmaýdy, sondaı-aq únemi sý iship otyrýdy keńes etip otyr.
