Japonııada aptap ystyq: 11 adam qaza taýyp, 5 myńnan astamy aýrýhanada jatyr
TOKIO. Kyodo-QazAqparat – Japonııadaǵy aptap ystyqtan 11 adam qaza taýyp, 5 664 turǵyn aýrýhanaǵa jetkizildi, dep habarlaıdy QazAqparat Kyodo agenttigine silteme jasap.
Japonııa jańalyqtar agenttiginiń deregi boıynsha, eldegi temperatýra jańbyr maýsymynyń aıaqtalýyna baılanysty birden kóterilgen.
Ótken aptadaǵy naýqastar sanymen salystyrǵanda, ystyqtan zardap shekkender sany úsh ese ósken. Órt pen tabıǵı apatqa qarsy kúres agenttiginiń deregine sáıkes, ystyqtan zardap shekkenderdiń 52,6 protsenti – 65 jastaǵy jáne odan úlken adamdar.
Aýrýhanada jatqandardyń ishinde 119 naýqas, dárigerlerdiń aıtýynsha, kem degende 3 apta emdeý mekemesinde jatýy kerek. Taǵy 1 792 adamnyń jaǵdaıy aýyr.
Japonııanyń 11 prefektýrasynda 11 adam qaza tapty. Aıtı prefektýrasynda eń kóp adam – 392, Osaka men Tokıoda tıisinshe 388 jáne 299 adam aýrýhanaǵa jatqyzylǵan.
Sınoptıkterdiń dereginshe, kelesi aptada Japonııada aýa temperatýrasy ortasha kórsetkishten joǵary bolady.
