Japonııada aptap ystyqtan bir aptada 7 adam kóz jumdy
ASTANA. KAZINFORM – Japonııada sońǵy bir apta ishinde aptap ystyq saldarynan 7 adam qaıtys boldy. Taǵy 9 myńnan astam turǵyn kún ótý belgilerimen aýrýhanaǵa jetkizildi, dep habarlaıdy reseılik TASS.
Japonııanyń qutqarý qyzmetteriniń jumysyn úılestiretin Ákimshilik ister jáne kommýnıkatsııalar mınıstrliginiń málimetinshe, 27 shilde men 2 tamyz aralyǵynda kún ótý belgilerimen 9 180 adam aýrýhanaǵa jatqyzylǵan. Olardyń jeteýi kóz jumǵan.
Mamyr aıynyń basynan beri, ıaǵnı apta saıynǵy statıstıka jarııalana bastaǵan ýaqyttan beri, kúnniń ystyǵynan aýrýhanaǵa túskender sany 52 myńnan asty. Osy kezeńde 79 adam qaza bolǵan.
Japonııada eń joǵary aýa temperatýrasy dástúrli túrde shilde jáne tamyz aılarynda tirkeledi. Sońǵy aptalarda eldiń keıbir óńirlerinde aýa temperatýrasy +40°C-tan joǵary kóterilgen.
Elde jyl saıyn aptap ystyq saldarynan ondaǵan myń adam kún ótip, júzdegen adam kóz jumady. Joǵary temperatýra adamdarǵa ǵana emes, janýarlarǵa da áser etip otyr. Ótken aptada Tokıo haıýanattar baǵynda úsh arystan ystyqtan qyrylǵan.
Eske salaıyq, buǵan deıin Rýmynııanyń birqatar óńirinde aýa raıyna baılanysty «qyzyl» qaýip deńgeıi jarııalanǵan bolatyn. Sondaı-aq sońǵy kúnderi Italııany da aptap ystyqtyń jańa tolqyny basyp, kóptegen iri qalada eń joǵary – «qyzyl» meteorologııalyq qaýip deńgeıi engizilgen edi.
