Japonııada anımatsııa stýdııasynda órt shyǵyp, 13 adam qaza tapty
KIOTO. QazAqparat - Beısenbi kúni tańerteń Japonııanyń Kıoto qalasyndaǵy anıme stýdııasynda órt shyǵyp, saldarynan 13 adam qaza tapty, dep xabarlaıdy QazAqparat Kyodo agenttigine silteme jasap.
Aldyn ala derek boıynsha, 40 shaqty adam túrli jaraqat alǵan, olardyń basym bóligi es-tússiz jatyr.
Jergilikti polıtsııa men qutqarýshylardyń deregi boıynsha, belgisiz bireý anımatsııalyq stýdııanyń ortalyǵyna janatyn suıyqtyq tógip, sol jerde jergilikti ýaqyt boıynsha tańǵy saǵat 10:35-te órt bastalǵan. Máıitterdiń kóbi Kyoto Animation Co. úsh qabatty stýdııasynyń ekinshi qabatynan tabylǵan. Órt shyqqan kezde 70-ke jýyq adam jumys istep jatqan.
Polıtsııanyń xabarlaýynsha, belgisiz bireýdiń «Ól!» dep aıqaılap, ǵımaratty jaǵyp jibergenin kórgen kýágerler bar. Oqıǵa ornynan pyshaqtar tabylǵan. Polıtsııanyń deregi boıynsha, jaraqattanyp, aýrýxanaǵa jetkizilgender arasyndaǵy 41 jastaǵy er adam órt qoıǵanyn moıyndaǵan.
Kyoto Animation - Japonııada «KyoAni» retinde tanylǵan japonııalyq kompanııa. Ol «K-On!» jáne «Harýhı Sýdzýmııa melanxolııasy» (Suzumiya Haruhi no Yuutsu) atty televızııalyq anımatsııalyq xıkaıalardy shyǵarǵan. Kompanııanyń negizi 1981 jyly qalanǵan.
