Japonııada alǵash ret JI kómegimen mı sıgnaldaryna negizdelgen sýret jasaldy

Japonııalyq mamandar álemde alǵash ret generatıvti jasandy ıntellekt (JI) kómegimen adam mıyndaǵy sıgnaldardy óńdeý arqyly sýret jasap shyǵarýǵa múmkindik beretin tehnologııa oılap tapty. Kazinform bul týraly TASS-qa silteme jasap habarlaıdy. 

Tájirıbe barysynda Ulttyq kvanttyq ǵylymdar jáne tehnologııalar ınstıtýtynyń zertteý toby adam nysandardy, landshafttardy kórip jatqan sáttegi mı sıgnaldaryn tirkedi. Tájirıbege qatysýshylarǵa shamamen 1200 sýret kórsetildi. Sondaı-aq mı belsendiligi fýnktsıonal magnıttik-rezonanstyq tomografııa (MRT) kómegimen taldandy.

Sýretter JI bazasyna júktelip, oǵan sýretterdi mı sıgnaldarymen sáıkestendirip úırený mindeti qoıyldy, dep habarlady Kyodo agenttigi.

Buǵan deıin júrgizilgen zertteý adam kórgen sýretter fýnktsıonaldyq MRT kómegimen óńdelgen mı sıgnaldary negizinde qaıta qurylýy múmkin ekenin kórsetken bolatyn. Degenmen mundaı tásilmen shekteýli sýretterdi ǵana jańǵyrtý múmkin bolǵan. Endi japonııalyq ǵalymdar aldyńǵy jetistikterdi negizge ala otyryp mı sıgnaldaryn sandyq sıpatqa aýystyryp, sol arqyly úıretilgen jasandy ıntellekt sýret jasap shyǵatyn baǵdarlama oılap tapty.

Sýretterdiń ishinde leopardtyń beınesi eń shynaıy boldy. Onda qulaǵy, aýzy, ala terisi anyq beınelengen.

Ǵalymdardyń pikirinshe, bul tehnologııany baılanys quraldaryn jasaǵanda jáne gallıýtsınatsııa men adamnyń túsin túsiný úshin paıdalanýǵa bolady.