Japonııada adamdy bir táýlikte tumaýdan jazyp shyǵara alatyn dári shyǵaryldy
ASTANA. QazAqparat - Japonııada adamdy bir táýlikte tumaýdan emdep shyǵara alatyn dári shyǵarylyp, testilendi, dep jazady Bı-bı-sı.
Jańa preparat vırýsqa onyń kóbeıýi úshin qajetti fermentterdiń qosylýyna jol bermeıdi. Dári alǵashqy klınıkalyq synaqtardan ótip, óz tıimdiligin kórsetti. Farmatsevtter tolyq saýyǵyp ketý úshin preparatty bir táýliktiń ishinde qabyldaý jetkilikti ekenine senimdi.
Qarasha aıynda óńdeýdi tájirıbelik qoldanýdyń ekinshi kezeńi josparlanǵan. Tumaýmen aýyrý oqıǵalarynyń sany kúrt ósken kezeńde dárini birneshe júzdegen patsıentke berip synaqtan ótkizedi.
Dáriniń tıimdiligi men qaýipsizdigi dáleldengen soń, ol lıtsenzııalaý protsedýrasynan ótedi. Preparatty dárihanalarda 2018 jyldan bastap satyp alýǵa bolatyny kútilýde.
Tamyzda amerıkandyq ǵalymdar adamdy tumaýdyń kez kelgen túrinen ómir boıy qorǵaýǵa qabiletti vaktsınamen jumys júrgizilip jatqanyn jarııalaǵan. Janýarlarǵa egilip testilengen bul vaktsına jaqsy nátıjeler kórsetti, endi mamandar preparattyń adamǵa qalaı áser etetinin anyqtaýda.
Qazirgi kezde tumaý vırýsynyń eki myńnan astam nusqasy anyqtalǵan. Birneshe jyl buryn Dúnıejúzilik densaýlyq saqtaý uıymynyń jarııalaǵan esebinde maýsymdyq epıdemııalar kezinde vırýstyń túrli nusqalarynan álemde jyl saıyn 250-den 500 myńǵa deıin adam kóz jumatyny aıtylǵan.
