Japonııada 90 jastan asqan turǵyndardyń sany 2 mln-nan asty
ASTANA. QazAqparat - Bıyl Japonııanyń jasy toqsannan asqan turǵyndarynyń sany 2 mıllıonnan asty. Elde Qarttardy ardaqtaý kúni qarsańynda Japonııa Densaýlyq saqtaý, eńbek jáne ál-aýqat mınıstrligi jyl saıyn jarııalap otyratyn japon qoǵamynyń jas erekshelikteri týraly statıstıka osyny kórsetedi.
1980 jyly bul kórsetkish 120 myńnyń aınalasynda edi.
Japon qoǵamy barǵan saıyn qartaıý ústinde ekeni aıtylyp otyr. Japon jastarynyń arasynda perzent súıý kórsetkishteri azaıyp ketken, basym kópshiligi bala týýǵa jasy ulǵaıa kele sheshim qabyldaıdy, al medıtsına sapasy údemeli ósip keledi. Osy faktorlardyń nátıjesinde eldegi ómir súrý uzaqtyǵy da sozylýda.
65 jastan asqan turǵyndardyń úlesi ósýin jalǵastyrýda, bıyl bul kórsetkish 27,7 %-ǵa jetken. Japonııada egde tartqan adamdardyń sany 35,14 mln-nan kem emes.
Qazirgi kezde Japonııada 65-ten asqan turǵyndardyń úshten biri jumys isteıdi.
