Japonııada 5,9 baldyq jer silkinisi tirkeldi: apat qaıtalanýy múmkin
ASTANA. KAZINFORM — Japonııanyń ońtústik-batys jaǵalaýynda magnıtýdasy 5,9 baldy quraıtyn jer silkinisi boldy. Bul týraly Kazinform agenttigi Kyodo-ǵa silteme jasap habarlady.
Japonııanyń meteorologııa agenttiginiń deregine sáıkes, jer silkinisi jergilikti ýaqyt boıynsha tańǵy 11:46–da bolǵan. Apat oshaǵy Okınava prefektýrasynyń negizgi aralynyń jaǵalaýynda, shamamen 50 shaqyrym tereńdikte ornalasqan.
Meteorologııalyq agenttik jer silkinisin Japonııanyń seısmıkalyq kórsetkishi boıynsha 7 balǵa baǵalady.
Mamandardyń aıtýynsha, bundaı jaǵdaıda adam aıaǵynda nyq tura almaıdy. Sondaı-aq ǵımarattaǵy ydys-aıaq, kitaptar jáne jıhazdar qulaýy múmkin.
Agenttik kúshti jer silkinisi aldaǵy bir apta ishinde, 2-3 kúnde qaıtalanýy múmkin ekenin eskertti.
Jergilikti bılik pen polıtsııa málimetinshe, qaza tapqandar joq, turǵyndardyń múlkine aıtarlyqtaı zııan kelmegen.
Sonymen qatar tsýnamı qaýpi týraly eskertý jarııalanbady.
Budan buryn Qytaıdyń ońtústiginde jer silkinisinen eki adam qaza tapqanyn jazǵanbyz.
Aýdarǵan: Darııa Ǵumar
