Japonııada 50 jyldaǵy eń iri órt 100-den astam ǵımaratty qıratty: bir adam qaza tapty

ASTANA.KAZINFORM - Sársenbi kúni Japonııanyń ońtústik jaǵalaýyndaǵy qalada 170-ten astam ǵımarat órtenip, bir adamnyń ómirin qıdy, dep habarlaıdy Kazinform agenttigi.

Reuters agenttiginiń habarlaýynsha, eldegi jarty ǵasyrǵa jýyq ýaqyt ishindegi eń iri qalalyq órtti sóndirý úshin áskerı jáne órt sóndirý tikushaqtary shuǵyl túrde jiberildi.

Áýeden túsirilgen vıdeolardan Oıta qalasynyń Saganosekı aýdanyndaǵy úılerdiń jappaı qıraǵanyn kórýge bolady. Jergilikti BAQ órttiń jaqyn mańdaǵy ormandy betkeılerge jáne jaǵalaýdan bir shaqyrymnan astam jerdegi turǵynsyz aralǵa taralǵanyn habarlady, bul qatty jelden bolýy múmkin.

Órt seısenbi kúni keshke bastalyp, 48 900 sharshy metr aýmaqty sharpydy, bul shamamen jeti fýtbol alańynyń kólemindeı. Japonııanyń Órt sóndirý jáne tótenshe jaǵdaılardy basqarý agenttiginiń málimeti boıynsha, nátıjesinde Tokıodan ońtústik-batysqa qaraı shamamen 770 shaqyrym jerde ornalasqan aýdannyń 175 turǵyny qaýipsiz jerge kóshirildi.

Agenttik órttiń sebebi tergelip jatqanyn aıtady. Jergilikti BAQ-tyń polıtsııaǵa silteme jasaı otyryp habarlaýynsha, bir adam qaza taýyp, 50 jastaǵy áıel jeńil kúıik jaraqattarymen aýrýhanaǵa jatqyzyldy.

- Biz adamdardyń qaýipsizdigine shyn júrekten úmit artamyz jáne sýyqqa baılanysty evakýatsııalanyp jatqan turǵyndarǵa sabyr tileımiz. Sondaı-aq, órt sóndirý qyzmetine, jergilikti bılik ókilderine jáne polıtsııaǵa jaǵdaıǵa der kezinde jaýap berýdegi kúsh-jigeri úshin alǵysymyzdy bildirgimiz keledi. Úkimet jergilikti bılik organdarymen birlesip, barynsha qoldaý kórsetedi, - dep jazdy Japonııa premer-mınıstri Sanae Takaıtı X platformasyndaǵy jazbasynda.

Buǵan deıin Marsel mańyndaǵy Penne-Mırabodaǵy Tesla dılerlik ortalyǵynda iri órt shyǵyp, ondaǵan elektromobılder órtenip ketken bolatyn.