Japonııada 36 adamdy órtep jibergen kúdikti ólim jazasyna kesiletin boldy

ASTANA. KAZINFORM – 2019 jyly Kyoto Animation stýdııasyna órt qoıyp, saldarynan adam ólimine kináli dep aıyptalǵan er adam apellıatsııalyq shaǵymyn qaıtaryp aldy, dep habarlaıdy Kyodo News. 

46 jastaǵy Sındzı Aoba 2024 jyldyń qańtarynda Japonııadaǵy anıme stýdııasynda 36 adamnyń ómirin qıǵan shabýyl úshin ólim jazasyna kesilgen. Qorǵaýshy tarap, odan keıin aıyptalýshynyń ózi apellıatsııalyq shaǵym túsirdi. Alaıda, Aoba dúısenbi kúni óz ótinishin qaıtaryp aldy. Osylaısha ólim jazasy rastaldy.

Japonııada buryn qorǵaý tarapy sottalýshynyń apellıatsııalyq shaǵymnan bas tartýynyń zańdylyǵyn daýlaǵan jaǵdaılar bolǵan. Aobanyń advokattary ázirge sońǵy oqıǵaǵa qatysty  málimdeme jasaǵan joq. 

Qaýlyǵa sáıkes, er adam 2019 jyldyń 18 shildesinde saǵat 10:30 shamasynda 70 qyzmetker jumys istep jatqan Kyoto Animation stýdııasynyń ǵımaratyna kirgen. Ol ǵımaratty benzın paıdalanyp órtep jiberip, saldarynan 36 adam mert bolyp, taǵy 32 adam jaraqat alǵan.
Aoba oqıǵadaǵy óz qylmysyn moıyndaǵandyqtan, onyń aqyl-esi durys pa, qylmystyq jaýapkershilikke tartylýy múmkin be degen basty másele boldy.

Aıyptalýshynyń málimdeýinshe, ol bul shabýyldy Kyoto Animation stýdııasy ol baıqaýǵa qatysqan romandy kóshirip aldy dep oılaǵandyqtan jasaǵan. Aobanyń qorǵaýshysy onyń psıhıkalyq turaqsyz jáne sandyraqpen aýyratynyna sendirdi. 

Sýdıa Aobanyń shynymen de sandyraqtan zardap shekkenin, biraq bul onyń minez-qulqyna az áser etkenin jáne sottalýshynyń sol kezde «esi durys emes nemese oılaý qabiletiniń tómendeýi» bolmaǵanyn moıyndady. 

Kyoto Animation búkil álem boıynsha anıme áýesqoılary arasynda ásirese «K-On!» jáne «Harýhı Sýzýmııanyń melanholııasy» shyǵarmalarymen erekshe tanymal.

Eske salsaq, budan buryn Japonııada sot 2019 jyly Kıoto Animation stýdııasyn órtep jibergen Sındzı Aobany ólim jazasyna keskenin jazǵan edik.