Japonııada 2026 jylǵy Azııa oıyndary resmı túrde aıaqtaldy
ASTANA. KAZINFORM — Japonııanyń Nagoıa qalasynda XX jazǵy Azııa oıyndarynyń jabylý saltanaty ótti.
Saltanatty shara 19 qyrkúıekte Oıyndardyń ashylý rásimi ótken Paloma Mizuho Stadium stadıonynda uıymdastyryldy. Jabylý saltanatynda júrek soǵysy men adamzattyń ortaq yrǵaqty birligin beıneleıtin HEART BEAT Aichi-Nagoya tujyrymdamasy kórinis tapty. Bul ıdeıa Azııa elderin bir arnaǵa toǵystyrýdy kózdeıtin IMAGINE ONE ASIA uranymen úndesedi. Eki saltanatty sharanyń da bas rejısseri japonııalyq ıÝkıhıko Tsýtsýmı boldy.
Negizgi rásim bastalmaı turyp-aq kórermenge arnalǵan merekelik baǵdarlama usynyldy. Arnaıy sahnada INI tobynyń múshesi Masaıa Kımýra, MYERA toby, telejúrgizýshi ári ázilkesh Kaeko Okýbo, Japonııanyń sport ǵylymdary ýnıversıtetiniń ókilderi, sondaı-aq Tokugawa Ieyasu and Hattori Hanzo Ninja Squad óner kórsetti. Baǵdarlamany YO! YO! YOSUKE pen Mıho Horıe júrgizdi.
Jabylý saltanatynyń negizgi bóligi mádenıet pen sportty ushtastyrdy. Stadıon tórinde bıshiler men ónerpazdar óner kórsetip, Azııa elderiniń birligi men san alýan mádenıetin pash etti. Saltanatty sharada 16 kúnge sozylǵan jarystyń aıaqtalǵany da aıryqsha kórinis tapty. Osy ýaqyt ishinde Azııanyń barlyq Ulttyq Olımpıadalyq komıtetteriniń ókilderi bir alańda bas qosyp, ózara baq synady.
Saltanatty shara aıasynda sportshylardyń dástúrli sherýi ótti. Azııa oıyndarynyń jabylý rásiminde Qazaqstannyń týyn 16 jastaǵy gımnast Aqmaral Erekesheva alyp shyqty. Ol qurlyqtyq dodaǵa alǵash ret qatysyp, jekeleı kópsaıystyń fınalyna birinshi orynmen joldama alǵan edi. Alaıda fınaldyq básekede tórtinshi orynǵa turaqtady.
Qurmetti qonaqtar qatarynda Japonııanyń taq murageri hanzada Akısıno men hanshaıym Kıko, Azııa Olımpıadalyq keńesiniń prezıdenti sheıh Djoan bın Hamad Ál Tanı jáne Qatar Premer-mınıstri sheıh Muhammed bın Abdýlrahman Ál Tanı boldy.
Jabylý saltanatynda Azııa Olımpıadalyq keńesi 2026 jylǵy qurlyqtyq dodada úzdik shyqqan sportshylardy da jarııalady. Eń úzdik sportshy ataǵy Qytaıdyń 13 jastaǵy júzgishi ıÝı Tszydıge buıyrdy. Ol áıelder arasynda 200 metrge batterflıaı ádisimen júzýde jáne 200, 400 metrge keshendi júzýde top jaryp, úsh altyn medal jeńip aldy. Sonymen qatar Azııa oıyndarynyń úsh rekordyn jáne Azııa rekordyn jańartty. Osylaısha, ıÝı Tszydı jarys tarıhyndaǵy eń jas úzdik sportshy atandy.
Erler arasynda bul marapat Taıland ókili Pýrıpol Býnsonǵa berildi. 20 jastaǵy jeńil atlet 100 jáne 200 metrge júgirýde qarsylas shaq keltirmedi. Ol jarys barysynda Azııa oıyndarynyń rekordyn tórt ret jańartty. Al 200 metrge júgirýdiń fınalynda 19,88 sekýnd nátıjesin tirkep, Azııa rekordyn qaıtalady.
Sportshylar sherýi men shyǵarmashylyq baǵdarlama aıaqtalǵan soń saltanatty jıynnyń resmı bólimi ótti. Uıymdastyrý komıtetiniń ókilderi Japonııada 16 kún boıy ótken jarystyń qorytyndysyn shyǵardy.
Keshtiń mańyzdy sátteriniń biri — Azııa oıyndarynyń estafetasyn kelesi qabyldaýshy elge tapsyrý rásimi boldy. Bul joly Azııa Olımpıadalyq keńesiniń týy Qatar ókilderine tabystalyp, 2030 jyly qurlyqtyq doda ótetin Doha qalasyna Oıyndardyń alaýy berildi.
Osylaısha, kelesi Azııa oıyndaryna daıyndyqtyń jańa tórtjyldyq kezeńi bastaldy. Doha qurlyqtyq dodany ekinshi ret qabyldamaq. Qatar astanasynda Azııa oıyndary alǵash ret 2006 jyly ótken bolatyn. Arada 24 jyl ótken soń qurlyqtaǵy eń iri kópsaıysty jarys qaıtadan Qatarda uıymdastyralady.
Saltanat sońynda Paloma Mizuho Stadium stadıonynda XX jazǵy Azııa oıyndarynyń alaýy sóndirildi.
Aıta keteıik, XX jazǵy Azııa oıyndary 19 qyrkúıek pen 4 qazan aralyǵynda ótti. Jarys baǵdarlamasyna 43 sport túri men 71 dıstsıplına engizilip, barlyǵy 469 medal jıyntyǵy sarapqa salyndy.
Qazaqstan quramasy qurlyqtyq dodany 84 medalmen aıaqtady. Otandastarymyz 12 altyn, 24 kúmis jáne 48 qola júlde jeńip aldy. Jalpykomandalyq esepte ulttyq qurama segizinshi orynǵa turaqtady. Hanchjoýda ótken aldyńǵy Azııa oıyndarymen salystyrǵanda Qazaqstan úsh satyǵa joǵary kóterilip, júldeler sanyn tórtke arttyrdy.
