Japonııada 2011 jyly tsýnamıden qıraǵan aspaly joldyń ornyna taý monorelsi ashyldy
ASTANA.KAZINFORM — Japonııanyń Kesennýma qalasynda 2011 jylǵy joıqyn jer silkinisi men tsýnamı saldarynan órtenip ketken aspaly joldyń ornyna salynǵan taý monorelsi paıdalanýǵa berildi, dep habarlaıdy Kyodo.
Monorels tabıǵı apattan jáne «Fýkýsıma-1» atom elektr stantsııasyndaǵy apattan keıin 15 jyldan astam ýaqyt ótken soń ashylyp tur.
Kesennýma qalasyna qarasty Osıma aralyndaǵy jańa monorels bıiktigi 235 metr bolatyn Kameıama taýynyń orta tusyn onyń shyńymen baılanystyrady. Taý basynda baqylaý alańy, jaıaý serýendeý joldary men kafe ornalasqan.
Monorels jeksenbi kúninen bastap jolaýshylarǵa qyzmet kórsete bastaıdy. Burynǵy aspaly jol qolaısyz aýa raıynda jumys isteı almaıtyn bolsa, jańa kólik quraly jyl boıy úzdiksiz qyzmet kórsetýge múmkindik beredi.
Kesennýma qalasynyń meri Sıgerý Sýgavara jańa nysan óńirge týrısterdi kóbirek tartýǵa yqpal etedi degen úmit bildirdi.
Synaq saparyna qatysqan kelýshiler teńizdegi ýstrıtsa fermalary men qala kórinisin tamashalady. Bir baǵyttaǵy jol shamamen 6–7 mınýtqa sozylady.
Monorels jyl saıynǵy Jańa jyl merekesi kezeńin qospaǵanda, kún saıyn jumys isteıdi. Orta mektep oqýshylary men eresekter úshin eki baǵytqa bılet quny — 1200 ıen (shamamen 7,4 dollar), bastaýysh synyp oqýshylaryna — 600 ıen. Mektepke deıingi jastaǵy balalarǵa jolaqysy — tegin.
Aıta keteıik, buǵan deıin Japonııa halyqaralyq týrıstik salyqty 3000 ıenge deıin kóteretini týraly habarladyq.
