Japonııada 16 myńǵa jýyq adamnyń ómirin qıǵan zilzala qurbandaryn eske alýǵa arnalǵan sharalar ótedi
ASTANA. QazAqparat - Japonııada osydan tórt jyl buryn 2011 jyldyń 11 naýryz kúni jer silkinisinen qaza bolǵandardy eske alýǵa arnalǵan sharalar ótip jatyr, dep habarlady rg.ru.
2011 jyly zilzaladan 15 870 adam qaza taýyp, 6 myńnan astam adam jaralanǵan. Úsh myńǵa jýyq adam iz-túzsiz joǵalyp ketti. Jarty mıllıon adam baspanasyz qaldy. Japonııanyń Mainichi basylymynyń habarlaýynsha, Tohoký ýnıversıtetiniń professory Sındzı Toda osy jer silkinisinen keıin aralda jer asty dúmpýleriniń arasy jıilep ketkenin aıtqan. Japonııanyń Meteorologııa agenttiginiń aqparatyna súıensek, 2014 jylǵy 11 naýryzdan bastap, 2015 jylǵy 9 naýryz aralyǵynda Honsıý aralynyń soltústik-shyǵysynda 1-den 7 ballǵa deıin 737 jer silkinisi tirkeldi. 2011 jyly bolǵan zilzalaǵa deıin Honsıýdiń soltústik-shyǵysynda 306 jer silkinisi bolǵan. Ǵalymdar bolashaqta Japonııada budan da qýatty zilzala bolýy múmkin dep eskertedi.
