Japonııada 100 jastan asqan turǵyndar sany rekordtyq deńgeıge jetti
ASTANA. KAZINFORM — Japonııada 100 jastan asqan turǵyndar sany alǵash ret 100 myńnan asty. Bul týraly Kazinform agenttigi Kyodo-ǵa silteme jasap habarlaıdy.
Japonııada 100 jastan asqan turǵyndar sany 107 677 adamǵa jetip, rekord jańartty. Bul kórsetkish 56 jyl qatarynan ósip keledi.
Kóp jasaǵandardyń 87,6 paıyzy — áıel. Olardyń sany — 94 298 adam.
Sonymen qatar 2026 qarjy jylynda 54 294 adamnyń 100 jasqa tolatyny boljanyp otyr. Bul byltyrǵymen salystyrǵanda 1 984 adamǵa kóp.
— Medıtsınalyq tehnologııalardyń damýy kóptegen adamnyń densaýlyǵyn nyǵaıtyp, uzaq ómir súrýine jaǵdaı jasaǵanyna qýanyshtymyz, — dedi Japonııanyń densaýlyq saqtaý mınıstri.
Japonııada bala týý kórsetkishiniń tómendeýi men halyqtyń qartaıýyna baılanysty áleýmettik qamsyzdandyrý shyǵyndary jyl saıyn artyp keledi. Bul el ekonomıkasyna túsetin salmaqty kúsheıtip otyr.
Kóp jasaǵan turǵyndar týraly derek alǵash 1963 jyly jınaqtala bastaǵanda, olardyń sany nebári 153 adamdy quraǵan edi. Al 1970 jyly bul kórsetkish 310 adamǵa jetip, sodan beri jyl saıyn ósip keledi. 1981 jyly 1 myńnan, 1998 jyly 10 myńnan, al 2012 jyly 50 myńnan asty.
2025 jyly Japonııada áıelderdiń ortasha ómir súrý uzaqtyǵy 87,33 jyl, al erlerdiki 81,35 jyl boldy.
Buǵan deıin Japonııa halqynyń sany 42 jylda alǵash ret 120 mıllıonnan tómendegenin habarlaǵan bolatynbyz.
Aqzat Jıenalına
