Japonııa jaǵalaýynda magnıtýdasy 5,9 bolatyn jer silkinisi boldy
ASTANA. KAZINFORM — Japonııanyń Hokkaıdo prefektýrasy jaǵalaýynda magnıtýdasy 5,9 bolatyn jer silkinisi tirkeldi, dep habarlaıdy Kazinform TASS-qa silteme jasap.
Eýropa-Jerorta teńizi seısmologııalyq ortalyǵynyń málimetinshe, jer silkinisiniń epıtsentri 173 myńǵa jýyq adam turatyn Obıhıro qalasynan ońtústikke qaraı 123 shaqyrym jerde ornalasqan.
Jerasty dúmpýleriniń oshaǵy 46 shaqyrym tereńdikte bolǵan.
Zardap shekkender men qıraǵan nysandar týraly aqparat túsken joq. Tsýnamı qaýpi jarııalanǵan joq.
Eske salaıyq, buǵan deıin Japonııanyń ortalyq bóliginde magnıtýdasy 5,9 bolatyn jer silkinisi tirkeldi. Onyń epıtsentri Tokıoǵa jaqyn ornalasqan Ibarakı prefektýrasynda bolǵanyn jazǵanbyz.
Kazinform úshin seriktes TASS agenttigi usynǵan materıal.
