Japonııa valıýta baǵamyn ustap turýǵa eki aıda rekordtyq 15,4 trln ıena jumsady
ASTANA. KAZINFORM – Japonııa shilde-tamyz aılarynda ulttyq valıýtanyń quldyraýyn tejeý úshin ıena satyp alýǵa rekordtyq 15,4 trln ıena (96 mlrd dollar) jumsady. Onyń ishinde AQSh bıligimen birlesken valıýtalyq ınterventsııa da bar, dep habarlaıdy Kyodo.
Japonııa Qarjy mınıstrliginiń juma kúni jarııalaǵan málimetinshe, 30 shildeden sársenbige deıingi kezeńde jumsalǵan qarajat bıyl sáýir-mamyr aılaryndaǵy úsh kúnde tirkelgen 11,73 trln ıenalyq burynǵy aılyq rekordtan asyp tústi. Naryq buǵan deıin ınterventsııa kólemin 11-12 trln ıena dep baǵalaǵan edi.
Japonııa úkimetindegi derekkóz el bıliginiń 30 shildede valıýta naryǵyna aralasqanyn rastady. Buǵan deıin, 23 shildede dollar baǵamy 163,99 ıenaǵa deıin kóterilip, shamamen 40 jyldaǵy eń joǵary deńgeıge jetken.
31 shildede Nıý-Iorktegi saýda-sattyq kezinde AQSh bıliginiń qatysýymen taǵy bir ınterventsııa júrgizildi. Bul eki eldiń sońǵy 15 jyldaǵy alǵashqy úılestirilgen valıýtalyq ınterventsııasy boldy. Keıin birlesken operatsııany eki eldiń úkimeti de rastady.
Premer-mınıstr Sanae Takaıchı shyǵyndardy qarjylandyrýdyń naqty josparyn usynbaı, memlekettik shyǵystardy belsendi túrde ulǵaıtyp otyrǵandyqtan, Japonııanyń qarjylyq jaǵdaıy odan ári nasharlaýy múmkin degen alańdaýshylyq bar. Osyǵan baılanysty ıenaǵa qysym saqtalyp otyr.
Al Iranmen soǵysty toqtatý týraly kelisimge qol jetkizý perspektıvasy áli belgisiz bolǵandyqtan, daǵdarys kezinde qaýipsiz aktıv sanalatyn AQSh valıýtasyna suranys joǵary bolyp otyr.
31 shildedegi ınterventsııadan keıin dollar baǵamy qysqa ýaqytqa 155 ıenadan sál joǵary deńgeıge deıin tómendedi. Alaıda keıin qaıta nyǵaıyp, qazir shamamen 159 ıena deńgeıinde saýdalanyp jatyr.
Ienanyń álsireýi ımporttyq taýarlardyń qunyn arttyryp, eldegi ınflıatsııanyń ósýine yqpal etedi.
Aıta ketsek, Qazaqstan Ulttyq qorynyń valıýtalyq aktıvteri $65,5 mlrd-qa jetkeni belgili boldy.
Al 14 tamyz kúni teńge eki aptada 10 teńgege nyǵaıǵanyn jazdyq.
