Japonııa uzaq jasaıtyndar sany jaǵynan rekordty jańartty

ASTANA. KAZINFORM – Japonııada 100 jáne odan joǵary jastaǵylardyń sany 95 119 adamdy qurap, rekord jańartty, dep jazady Japonııanyń Kyodo News segnttigi.

100 jáne odan joǵary jastaǵy japondyqtardyń sany 54-shi jyl qatarynan ósip keledi.

Japonııanyń Densaýlyq saqtaý, eńbek jáne ál-aýqat mınıstrligi Ulttyq qarttar kúni merekesinen bir kún ótken soń, 15 qyrkúıektegi jaǵdaı boıynsha uzaq jasaıtyndardyń jalpy sany ótken jylmen salystyrǵanda 2 980 adamǵa óskenin habarlady. Onyń ishinde áıelder 88,3% - 83 958 adamdy qurady.

Esterińizge sala keteıik, 116 jastaǵy Tomıko Itoka álemdegi eń qart adam bolyp tanyldy. Ol 1908 jyly 23 mamyrda dúnıege kelgen jáne Hıogo prefektýrasynda turady.

100-den asqan er adamdar sany 11 161 adamdy qurady, eldegi eń qart er adam Shızýoka prefektýrasynda turatyn 110 jastaǵy Kıetaka Mıdzýno. Ol 1914 jyly 14 naýryzda dúnıege kelgen.

Mınıstrlik eldegi ómir súrý uzaqtyǵy 2023 jyly áıelder úshin 87,14 jasqa jáne erler úshin 81,09 jasqa jetkenin aıtty.

1963 jyly alǵash derekter jınala bastaǵan kezde Japonııadaǵy uzaq jasaǵandar sany 153 boldy. 1981 jyly bul kórsetkish 1000-nan asyp, 1998 jyly 10000-ǵa jetti.

Buǵan deıin 65 jastan asqan japon azamattarynyń sany rekordtyq kórsetkishke jetip, 36,25 mıllıon adamǵa jetkeni, bul ótken jylmen salystyrǵanda 20 myń adamǵa artyq ekeni habarlanǵan.