Japonııa, Ulybrıtanııa jáne Italııa joıǵysh ushaq shyǵaratyn zaýyt salmaq
ASTANA. KAZINFORM — Japonııa, Ulybrıtanııa jáne Italııa jańa býyn joıǵysh ushaǵyn birlesip jasaý baǵdarlamasy aıasyndaǵy jumystaryn jalǵastyryp jatyr. Japonııadaǵy ushaqty ázirleý jáne qurastyrý ortalyǵy retinde Aıtı prefektýrasyndaǵy Mitsubishi Heavy Industries zaýyty qarastyrylyp jatyr, dep habarlaıdy Kyodo.
Derekkózdiń málimetinshe, Japonııadaǵy óndiristik alań Mitsubishi Heavy Industries kompanııasynyń Komakı-Saýt zaýytynda ornalasady. Ortalyqty osy jyldyń sońyna deıin qurý josparlanyp otyr. Qazirdiń ózinde kásiporynda jańa ushaqty ázirleýge qatysyp jatqan brıtandyq ınjenerler jumys isteıdi.
Sonymen qatar seriktes elder ushaqty jobalaý jáne óndirý mindetterin ózara bólisken. Ulybrıtanııa Ýortondaǵy ortalyǵyn damytsa, Italııa Týrındegi ortalyǵyn jetildiredi.
Mitsubishi Heavy Industries úshin jańa býyn joıǵysh ushaǵyn jasaý baǵdarlamasy aımaqtyq jolaýshylar ushaǵy Mitsubishi Regional Jet jobasy aıaqtalǵannan keıingi negizgi damý baǵyttarynyń birine aınalyp otyr.
Japonııa, Ulybrıtanııa jáne Italııa birlesken baǵdarlamany 2022 jyly iske qosty. Jańa áskerı ushaqtardy alǵashqy jetkizý 2035 jyly bastalady dep josparlanǵan. Osy aptada Kanada jobaǵa alǵashqy baqylaýshy retinde qosyldy. Germanııa men Aýstralııa da jobaǵa qatysýǵa qyzyǵýshylyq tanytyp otyr.
Bolashaq joıǵysh ushaqqa radıolokatsııalyq kórinýdi azaıtatyn tehnologııalar, úlken kólemdegi aqparatty óńdeýge qabiletti zamanaýı radar jáne jasandy ıntellekt arqyly derekterdi taldaý júıesi engiziledi.
Ushaqty japondyq Japan Aircraft Industrial Enhancement Co. Ltd., brıtandyq BAE Systems jáne ıtalııalyq Leonardo kompanııalary qurǵan birlesken kásiporyn — Edgewing ázirlep jatyr.
Buǵan deıin Japonııa parlamenti ekinshi astana qurý týraly zańdy maquldaǵany týraly jazǵan bolatynbyz.
