Japonııa úkimeti rezervten qosymsha 200 myń tonna kúrish bólmek

ASTANA. KAZINFORM – Japonııa úkimeti memlekettik qordaǵy kúrishtiń taǵy 200 myń tonnasyn bólýdi josparlap otyr. Bul kólem kúrishti tikeleı kelisimsharttar arqyly bólshek saýdagerlerge satý arqyly júzege asyrylady. Bul týraly seısenbi kúni Aýyl sharýashylyǵy mınıstri Sındzıro Koıdzýmı málimdedi, dep habarlaıdy Kyodo News.

Osylaısha, elde shamamen 100 000 tonna kúrish qory ǵana qalady. Buǵan deıin bul kórsetkish 910 000 tonna bolǵan, alaıda naýryz-sáýir aılarynda úkimet ony aýktsıon arqyly sata bastaǵannan keıin kúrt azaıǵan. Qordyń tez taýsylýy tótenshe jaǵdaı kezinde kúrishtiń jetkiliksiz bolýy múmkin degen alańdaýshylyq týdyrdy.

Sındzıro Koıdzýmı kúrishtiń shaǵyn sýpermarketter jelilerine, mamandandyrylǵan dúkenderge jáne iri bólshek saýda oryndaryna bólinetinin málimdedi. Aýyl sharýashylyǵy mınıstrligi ótinimderdi sársenbiden bastap qabyldaı bastaıdy.

Japonııa dúkenderinde ótken jazdan beri kúrish tapshylyǵy baıqalyp keledi. Bul jaǵdaı kúrish baǵasynyń joǵary deńgeıde saqtalýyna sebep boldy. Bıylǵy baǵa byltyrǵydan eki ese qymbat.

Aıta keteıik, Sındzıro Koıdzýmı Japonııanyń aýyl, orman jáne balyq sharýashylyǵy mınıstri qyzmetine burynǵy mınıstr Taký Eto qyzmetinen ketken soń taǵaıyndalǵan bolatyn. Taký Eto kúrishti satyp almaıtynyn, sebebi ony jaqtastary kóp mólsherde syılaıtynyn aıtqannan keıin synǵa ushyrap, otstavkaǵa ketken edi.