Japonııa úkimeti polıtsııaǵa aıý shabýylyna qarsy qarý qoldanýǵa ruqsat berýi múmkin
ASTANA. KAZINFORM — Japonııa úkimeti elde jıilep ketken aıý shabýyldarynyń aldyn alý maqsatynda qosymsha sharalardy qolǵa aldy. Bılik polıtsııa qyzmetkerlerine aıýlarǵa qarsy atys qarýyn qoldanýǵa ruqsat berý múmkindigin qarastyryp jatyr, dep habarlaıdy Kyodo.
Bıylǵy qarjy jylynyń (sáýirden bastap) ózinde aıý shabýyldarynan elde 12 adam qaza tapqan — bul buryn-sońdy bolmaǵan kórsetkish. Mınıstrler kabınetiniń bas hatshysy Mınorý Kıhara aıý shabýyldaryna qatysty ótken mınıstrlikaralyq jıynda qazirgi jaǵdaıdy «el azamattarynyń qaýipsizdigi men tynyshtyǵyna tóngen naqty qater» dep atady.
Jıynǵa qatysatyn mınıstrlikter sany burynǵy besten segizge deıin ulǵaıtylyp, alǵash ret Qorǵanys mınıstrligi de qosyldy. Kıhara shuǵyl sharalar josparyn júzege asyrýdy tapsyrdy.
«Qorshaǵan orta mınıstrliginiń málimetinshe, 2025 qarjy jylyndaǵy 12 ólim jaǵdaıy 2023 jylǵy rekordtyq alty oqıǵamen salystyrǵanda eki ese kóp», dep jazdy Kyodo.
Mınıstrlik 2025 jylǵy qosymsha bıýdjet aıasynda ańshylardy tartýǵa arnalǵan qarjy bólý jáne aıý popýlıatsııasyn retteý saıasatyn ázirleý josparlaryn málimdedi. Sondaı-aq 2024 jyly engizilgen aıýlarǵa qarsy baqylaý sharalarynyń kúsheıtiletini aıtyldy.
Aıta ketsek, Japonııada aıýlardyń adamdarǵa shabýyly rekordtyq deńgeıge jetken.
Al Rıdderde jedel top kóshede júrgen aıýlardy úrkitip, eldi meken mańynan alshaqtatty.