Japonııa úkimetiniń burynǵy basshysy Sındzo Abe qaıtys boldy
TOKIO. QazAqparat - Búgin tańerteń Japonııanyń burynǵy premer-mınıstri Sındzo Abeni belgisiz bireý atyp ketken bolatyn. Arada birneshe saǵat ótkende eks-premer aýrýhanada kóz jumdy, dep habarlaıdy QazAqparat Kyodo agenttigine silteme jasap.
Buǵan deıin aqparat agenttigi lıberal-demokratııalyq partııanyń burynǵy basshysy aýyr jaraqat alǵanyn habarlaǵan edi.
Japonııanyń halyqaralyq NHK telearnasynyń habarlaýynsha, úgit-nasıhat naýqany aıasynda eldiń batysyndaǵy Nara prefektýrasyna kelip, halyq aldynda sóz sóılep turǵan Sındzo Abege belgisiz bireý oq atqan.
Eks-premer denesine oq tıip, sol mezette jerge qulap túsken.
Oqıǵa jergilikti ýaqyt boıynsha 11:30-da bolǵan. Órt sóndirý qyzmetiniń habarlaýynsha, burynǵy premer-mınıstr aýrýhanaǵa jetkizilgen.
Polıtsııanyń aqparatyna sáıkes, kúdikti oqıǵa ornynda qamaýǵa alynǵan. Ol - shamamen 40 jastaǵy er adam.
