Japonııa týrıster úshin tanymal baǵytqa aınaldy

ASTANA. KAZINFORM - Japonııa úkimetiniń jarııalaǵan derekterine sáıkes, 2025 jyldyń alǵashqy alty aıynda elge 21,5 mıllıon sheteldik týrıst barǵan. Bul – rekordtyq kórsetkish, dep habarlaıdy Kyodo News. 

Japonııanyń Ulttyq týrızm uıymynyń málimetinshe, ótken jyly 17,78 mıllıon adam bolǵan aldyńǵy rekordtan asyp túsken.

Tek maýsym aıynda Japonııaǵa 3,38 mıllıon sheteldik týrıst barǵan. Bul ótken jylmen salystyrǵanda 7,6 paıyzǵa kóp.

Jarty jyldyń ishinde Japonııaǵa eń kóp týrıst Ońtústik Koreıa men Qytaıdan barǵan.

Alaıda týrıster aǵynynyń kúrt artýy birqatar máselege de sebep boldy. Sonyń ishinde eń ózektisi – belgili bir baǵyttarda shekten tys týrızmniń artýy jergilikti turǵyndardyń ómir súrý sapasyna keri áser etip otyr.

Sonymen qatar, Japonııanyń Týrızm basqarmasynyń baǵalaýynsha, sheteldik týrısterdiń sáýir men maýsym aralyǵyndaǵy jalpy shyǵyny shamamen 2,5 trln ıen (shamamen 16,8 mlrd AQSh dollar) bolǵan. Bul ótken jyldyń sáıkes kezeńimen salystyrǵanda 18 paıyzǵa joǵary.

Orta eseppen bir týrıst Japonııada 239 000 ıen (shamamen 851 000 teńge) jumsaǵan. Eń kóp shyǵyn jasaǵandar – Ulybrıtanııa azamattary, olar shamamen 444 000 ıen jumsaǵan. Odan keıingi oryndarda – ıtalııalyqtar (398 000 ıen) jáne nemister (396 000 ıen).

Aıta keteıik, buǵan deıin Japonııa úkimeti jergilikti turǵyndar men sheteldik týrıster arasyndaǵy máselelerdi sheshý úshin arnaıy keńse qurǵan.