Japonııa týrıster shyǵynyn ótep bermek
TOKIO. QazAqparat – Japonııa úkimeti koronavırýs pandemııasynan zardap shekken týrızm ındýstrııasyn jandandyrý maqsatynda saıahattaýshylardyń shyǵynyn ishinara óteýdi sheshti, dep habarlaıdy QazAqparat Kyodo agenttigine silteme jasap.
1,35 trıllıon ıen (12 mıllıard AQSh dollarynan astam) bólingen Go To Travel bastamasy aıasynda Japonııa úkimeti saıahattaýshylarǵa kúnine 20 myń ıenge (185 AQSh dollary) jýyq sýbsıdııa berýdi sheshti.
Sýbsıdııalar saparlar qunynyń jartysyn jabady jáne demalýshylar jaqyn ornalasqan meıramhanalar men dúkenderde paıdalana alatyn úlken jeńildikter men vaýcherler beriledi. Bastama shilde aıynyń sońynda iske qosylatyny kútilýde.
Japonııa sapar qunynyń jartysyn óteıtini týraly bastamany estigennen keıin áleýmettik jeli paıdalanýshylary onyń sheteldik týrısterge de qatysy bar degen oıǵa kelgen. Biraq, shyn mánisinde olaı emes.
Forbes-tiń jazýynsha , Japonııanyń bul jobasy COVID-19 pandemııasynan keıin el ishinde saıahattaýdy yntalandyrýǵa baǵyttalǵan jáne memleket aýmaǵynda saparlaıtyn japonııalyqtarǵa ǵana qatysty.
Kyodo koronavırýs el týrızmine eleýli áser etkenin atap ótedi. Sebebi Tokıoda Olımpıada keıinge qaldyryldy, tıisinshe sheteldik týrıster de kelmeıdi.
Tokyo Shoko Research zertteýine sáıkes, 31 qonaqúı bıznesi bankrot bolǵanyn jarııalady.
Osy aptanyń basynda premer-mınıstr Sındzo Abe Tokıoda jáne onyń mańaıynda, sondaı-aq Hokkaıdoda tótenshe jaǵdaı rejımi alynǵanyn málim etti.
