Japonııa tsıfrlyq kóshpendiler úshin jańa vıza júıesin engizbek
ASTANA. KAZINFORM – Japonııa úkimeti juma kúni sheteldik talanttar men «tsıfrlyq kóshpendiler» degen atpen tanymal qashyqtan jumys isteıtin adamdarǵa jańa vıza júıesi aıasynda elde uzaǵyraq bolý múmkindigin berýdi josparlap otyrǵanyn málimdedi, dep habarlaıdy Kyodo News aqparat agenttigi.
Usynylǵan júıege sáıkes, kompanııalarda qashyqtan jumys istep júrip, saıahatqa shyqqan sheteldik azamattar Japonııada alty aıǵa deıin tura alady.
Mıgratsııalyq qyzmet agenttiginiń málimetinshe, bul merzim qysqa merzimdi týrıstik vızaǵa ruqsat etilgen 90 kúnnen edáýir uzaǵyraq.
Vıza alý úshin jumysshylardyń jyldyq tabysy 10 mln ıennen (68 200 AQSh dollary) asýy jáne vıza shekteýlerinen bosatylǵan jáne Japonııamen salyqtyq qarym-qatynasy bar 49 el men aımaqtyń biriniń rezıdenti bolýy tıis. Olardyń jubaıy/zaıyby men balalaryna da elge kirýge ruqsat etiledi.
El úkimeti jańa júıeni naýryzda aıaqtalatyn 2023 qarjy jylynda engizýdi josparlap otyr.
«Álemde 35 mıllıonnan astam adam tsıfrlyq kóshpendiler retinde jumys istep júr», - dep habarlaıdy Mıgratsııa qyzmeti AQSh týrıstik kompanııasynyń saýalnamasyna silteme jasap.
Ótken jyldyń maýsym aıynda japon úkimeti olardyń elde bolý merzimin uzartý múmkindigin qarastyratynyn aıtty.
«Tsıfrlyq kóshpendiler ınnovatsııanyń qaınar kózi bola alady. Kóptegen elder olardy tartýǵa kúsh salyp jatqanda, biz olardyń Japonııada da jumys isteıtininen úmittenemiz», - dedi Ádilet mınıstri Rıýdjı Koıdzýmı baspasóz máslıhatynda.
