Japonııa Tashkentte nevrologııa jáne ınsýlt ortalyǵyn salýǵa qarjy bóledi
TAShKENT. KAZINFORM - 147 mıllıon dollar nesıe jańa ortalyq salýǵa, sondaı-aq Samarqand pen Buharadaǵy medıtsınalyq mekemelerdi jabdyqtaýǵa baǵyttalady, dep habarlaıdy Kazinform agenttigi Japonııanyń Ózbekstandaǵy elshiliginiń baspasóz qyzmetine silteme jasap.
2025 jyldyń 20 qańtarynda Ózbekstan Investıtsııalar, ındýstrııa jáne saýda mınıstrliginde Japonııanyń Ózbekstandaǵy Tótenshe jáne Ókiletti Elshisi Hatorı Takashı men Ózbekstannyń Investıtsııalar, ındýstrııa jáne saýda mınıstri Lazız Kýdratov, jalpy quny 22,953 mıllıard ıen (147 mıllıon dollar) bolatyn «Densaýlyq saqtaý jáne medıtsınalyq kómekti jaqsartý jobasy» boıynsha ózara túsinistik týraly memorandýmǵa qol qoıdy. Bul ıen nesıe jobasy ekonomıkalyq yntymaqtastyq úshin arnaıy sharttardy qoldanady.
Kezdesýde aıtylýna qaraǵanda, Ózbekstannyń ekonomıkalyq damýy men ómir saltynyń ózgerýimen qatar ınsýlt sııaqty juqpaly emes aýrýlardan kóz jumatyndar sany artyp keledi. Tashkent qalasyndaǵy júıke aýrýlaryna shaldyqqan naýqastarǵa qyzmet kórsetetin aýrýhanalar sanynyń jetkiliksizdiginen basqa, óńirlerdegi úshinshi satydaǵy aýrýhanalarda júıke aýrýlaryna arnalǵan medıtsınalyq jabdyqtardyń joqtyǵy nemese jetkiliksizdigi tıisti medıtsınalyq qyzmetterdi der kezinde ala almaý problemasyn týǵyzyp otyr.
Osy mindetterdi sheshý úshin bul joba Tashkentte nevrologııa jáne ınsýlt ortalyǵyn salyp, jabdyqtaıdy, sonymen qatar Samarqand pen Buharadaǵy úshinshi satydaǵy medıtsınalyq mekemelerdi jabdyqtaıdy, osylaısha nevrologııalyq aýrýlar sııaqty juqpaly emes aýrýlardy emdeýdi jaqsartady.
Joba, eń aldymen, juqpaly emes aýrýlar boıynsha sapaly medıtsınalyq qyzmet kórsetý júıesin jetildirý jáne Ortalyqtyń medıtsınalyq kadrlardy daıarlaýdyń bazalyq oqý ortalyǵy retindegi fýnktsııalaryn kúsheıtý arqyly Ózbekstan halqynyń densaýlyǵyn nyǵaıtýǵa qyzmet etedi.
Nesıe sharttary:
Paıyz mólsherlemesi: 0,50% (belgilengen/standartty), (keńes berý qyzmeti: 0,40%)
Óteý merzimi: 40 jyl (jeńildik kezeń: 10 jyl).
Eske sala keteıik, bıyl Ózbekstan úkimeti 5,2 mln adamdy jumyspen qamtýdy josparlap otyr.