Japonııa Syrtqy ister mınıstri Irandy «sabyrǵa» shaqyrdy
TOKIO. KAZINFORM – Japon úkimeti Taıaý Shyǵystaǵy shıelenistiń odan ári órshýine jol bermeý úshin Irandy sabyrǵa shaqyrdy. Bul týraly Anadoly jazdy.
Japonııa Syrtqy ister mınıstri Takesı Ivaıa ırandyq áriptesi Abbas Aragchımen telefon arqyly sóılesti.
Japonııa Syrtqy ister mınıstrliginiń baspasóz qyzmeti 40 mınýttyq áńgime barysynda Ivaıa óz eliniń Taıaý Shyǵystaǵy shıelenistiń artýyna, atap aıtqanda Irannyń Izraılge jasaǵan sońǵy shabýylyna baılanysty «eleýli alańdaýshylyǵyn» bildirgen.
Ivaıa barlyq taraptardy, sonyń ishinde Irandy shıelenistiń odan ári órshýine jol bermeý úshin sabyrlylyq tanytýǵa shaqyrdy, sondaı-aq aımaqtaǵy shıelenis ulǵaıǵan jaǵdaıda japon azamattarynyń qaýipsizdigin qamtamasyz etýde Irannan qoldaý kútetinin aıtty.
Iran Syrtqy ister mınıstrliginen jasalǵan jazbasha málimdemege qaraǵanda, Aragchı men Ivaıa aımaqtaǵy sońǵy ózgerister týraly pikir almasqan.
Mınıstrler odan ári turaqsyzdyqqa jol bermeý, Gaza men Lıvanda shuǵyl atysty toqtatýdy qamtamasyz etý jáne Izraıl shabýyldary kezinde osy aımaqtarǵa gýmanıtarlyq kómek jetkizý úshin halyqaralyq kúsh-jiger qajettigin atap ótti.
Syrtqy ister vedomstvolarynyń basshylary ekijaqty qarym-qatynastardy nyǵaıtý jáne aımaqtaǵy beıbitshilik pen turaqtylyqty qamtamasyz etý maqsatynda konsýltatsııalardy jalǵastyrýǵa kelisti.
