Japonııa sheteldikterge qatysty máselelerdi sheshý úshin arnaıy organ qurdy

ASTANA. KAZINFORM — Japonııa úkimeti jergilikti turǵyndar men sheteldikterdiń úılesimdi ómir súrýin qamtamasyz etý úshin jańa keńse qurdy, dep habarlaıdy NHK World-Japan.

Atalǵan keńse Mınıstrler kabıneti hatshylyǵynyń quramyna kiredi jáne onyń quramynda Kabınet, Ádilet mınıstrligi men basqa da vedomstvolardyń ókilderi bar. Keńseniń resmı ashylý saltanaty seısenbi kúni Premer-mınıstr keńsesinde ótti.

Premer-mınıstr Sıgerý Isıba Japonııanyń týý kórsetkishiniń tómendeýimen, halyqtyń qartaıýy men sanynyń azaıýymen betpe-bet kelip otyrǵanyn aıtty. Sondyqtan da ol sheteldik eńbek mıgranttaryn tartý men týrısterdiń el ishindegi shyǵynyn arttyrý arqyly syrtqy resýrstardy tıimdi ıgerý qajet ekenin jetkizdi.

Sondaı-aq Isıba keıbir sheteldikterdiń qylmystyq áreketteri, tártipke saı emes minez-qulqy men júıelerdi teris paıdalanýy japon qoǵamynda alańdaýshylyq pen ádiletsizdik sezimin týdyryp otyrǵanyn aıtty.

Onyń aıtýynsha, úkimettiń mańyzdy mindeti – erejelerdi saqtamaıtyndarǵa qatań sharalar qoldaný jáne qazirgi jaǵdaıǵa sáıkes kelmeıtin júıeler men sharalardy qaıta qaraý.

Premer jańa keńse qyzmetkerlerine sheteldikterdiń alań týdyrǵan áreketterin zerdeleýdi jáne túrli júıelerdi qaıta qaraýdy tapsyrdy.

Aıta keteıik, 2024 jyly Japonııada týǵan balalardyń sany ótken jylmen salystyrǵanda 5,7%-ǵa tómendep, 686 061 balany qurady.

Buǵan deıin Japonııada 60 jastan asqan ájelerdi «jalǵa alý» qyzmeti tanymal bolyp kele jatqanyn jazǵan edik.