Japonııa sheteldikter úshin vızalyq alymdy bes esege arttyrdy
ASTANA. KAZINFORM — Japonııa 1 shildeden bastap shetel azamattary úshin vızalyq alymdy bes esege, al elden shyǵý salyǵyn úsh esege arttyrdy. Bul sharalar shamadan tys týrızmniń aldyn alýǵa baǵyttalǵan, dep habarlaıdy Kazinform agenttiginiń tilshisi Kyodo News saıtyna silteme jasap.
Japonııa úkimeti 1 shildeden bastap elden shyǵý salyǵyn bir adamǵa 1000 ıennen 3000 ıenge (shamamen 8 800 teńge) deıin ulǵaıtty.
Sondaı-aq, osy kúnnen bastap Japonııaǵa kirý úshin vıza qajet bolatyn shetel azamattaryna arnalǵan vızalyq alym bes esege ósti. Bir mártelik vızanyń quny 15 000 ıenge (shamamen 44 000 teńge), al kópmártelik vızanyń quny 30 000 ıenge (shamamen 88 000 teńge) deıin kóterildi. Sonymen qatar, elden shyǵý salyǵynyń ósýine baılanysty qarjylyq júktemeni azaıtý úshin Japonııa bıligi óz azamattaryna pasport rásimdeý qunyn tómendetti.
Elden shyǵý salyǵy jolaýshynyń azamattyǵyna qaramastan áýe jáne teńiz kóligi bıletterin satyp alý kezinde alynady. Bul tólemnen tek el aýmaǵynda 24 saǵattan az ýaqyt bolatyn tranzıttik jolaýshylar men eki jasqa tolmaǵan balalar bosatylady.
Jınalǵan qarajat tanymal týrıstik oryndarǵa túsetin júktemeni azaıtýǵa jumsalady. Atap aıtqanda, sheteldik týrıster kóp jınalatyn áıgili fototúsirilim oryndarynda arnaıy aımaqtar jabdyqtalady.
Budan bólek, qarjy óńirlik týrızmdi damytýǵa baǵyttalady. Onyń aıasynda temirjol vokzaldary jańǵyrtylyp, jergilikti temirjol jelileri týrıstik baǵyttarǵa aınaldyrylady. Bul saıahatshylardy týrıster sırek baratyn óńirlerge tartýǵa múmkindik beredi.
Buǵan deıin Japonııa ushaqtaǵydaı jeke kýpeleri bar «Supreme Class» qyzmetin joǵary jyldamdyqty poıyzdarda iske qosatynyn jazǵanbyz.
