Japonııa Semeı polıgonynan zardap shekkenderge qaıtarymsyz grant bóledi
ASTANA. KAZINFORM — Qazaqstan men Japonııa qaıtarymsyz grant bólý týraly úkimetaralyq qujatqa qol qoıdy. Bul týraly Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý málim etti.
Aıta keteıik, búgin Astanaǵa alǵash resmı saparmen Japonııa Syrtqy ister mınıstri Takeshı Ivaıa keldi. Kezdesý barysynda ekijaqty qarym-qatynasty jańa deńgeıge kóterý jolyndaǵy máseleler talqylandy.
— Áriptesimmen óńirlik jáne jahandyq ózekti taqyryptar boıynsha jan-jaqty pikir almastyq. Kóptegen halyqaralyq másele boıynsha Qazaqstan men Japonııanyń ustanymy uqsas. «Ortalyq Azııa jáne Japonııa» dıalogyn odan ári damytýǵa ózara nıetimizdi rastadyq. Qazaqstan men Japonııa álem elderin ıadrolyq qarýdan bas tartýǵa úndep keledi. Osy turǵyda, Japonııa Syrtqy ister mınıstriniń sapary Semeı ıadrolyq polıgonynyń jabylý kúni qarsańyna tuspa-tus kelýi erekshe mańyzǵa ıe, — dedi Murat Nurtileý BAQ aldynda málimdeme jasap.
Bıyl Hıroshıma men Nagasakı qasiretine 80 jyl, al kelesi jyly Semeı polıgonynyń jabylýyna 35 jyl tolady.
— Búgin ıadrolyq synaqtardan zardap shekkenderge járdemdesý maqsatynda Qazaqstanǵa qaıtarymsyz grant bólý týraly úkimetaralyq qujatqa qol qoıdyq (7,4 mln doll.). Búginde Osakada ótip jatqan EKSPO dúnıejúzilik kórmesi Qazaqstannyń jetistigin Japon eline tanytýǵa múmkindik berip jatyr. Kórmeniń tabysty aqtalýyna tilektespiz, — dep tolyqtyrdy mınıstr.
Buǵan deıin habarlaǵanymyzdaı, Prezıdent jyl sońynda resmı saparmen Japonııaǵa barýy múmkin.
Aıta keteıik, Japonııa Qazaqstanda iri ınvestor elderdiń ondyǵyna kiredi.