Japonııa saılaý kezinde áleýmettik jelilerdi paıdalaný talaptaryn kúsheıtti
ASTANA. KAZINFORM — Japonııa parlamenti saılaý naýqany kezinde áleýmettik jelilerdi paıdalaný erejelerin kúsheıtetin zańdy qabyldady, dep habarlaıdy Kyodo.
Jańa zań kandıdattar týraly jalǵan aqparat taratýdy shektep, jasandy ıntellekt kómegimen jasalǵan nemese óńdelgen materıaldardy jarııalaýǵa jańa talaptar engizedi.
Qujattyń maqsaty — saılaý úderisiniń ashyqtyǵyn arttyrý, sóz bostandyǵyn qorǵaý jáne azamattardy kandıdattar týraly senimdi aqparatpen qamtamasyz etý.
Zańǵa sáıkes, áleýmettik jeli platformalary saılaý kezinde jalǵan aqparattyń taralýyn shekteý úshin tıisti sharalar qabyldaýǵa mindetti bolady.
Japonııanyń Іshki ister jáne kommýnıkatsııalar mınıstrligi jańa talaptardy iske asyrý jónindegi usynymdardy ázirlep, olardyń oryndalýy týraly jyl saıyn esep jarııalap otyrady.
Sonymen qatar zańda jańa talaptardy oryndamaǵan platformalarǵa qatysty jaza qarastyrylmaǵan. Osyǵan baılanysty sarapshylar onyń tıimdiligine kúmán keltirip otyr.
Sondaı-aq saılaýǵa qatysty jasandy ıntellekt arqyly jasalǵan nemese óńdelgen sýretter men beınerolıkterdi jarııalaǵan paıdalanýshylar mundaı kontenttiń JI kómegimen ázirlengenin nemese óńdelgenin mindetti túrde kórsetýi tıis.
Іlespe qaýlyda platformalarǵa jalǵan aqparatpen kúresti kúsheıtý úshin kúmándi kontentti monetızatsııalaýdy toqtatý, resmı aqparat kózderiniń jarııalanymdaryn kóbirek kórsetý jáne paıdalanýshylarǵa eskertý belgilerin ornalastyrý usynylǵan.
Jańa talaptar 2027 jylǵy 1 naýryzdan bastap, Japonııada ótetin kezekti biryńǵaı jergilikti saılaý qarsańynda kúshine enedi.
Aıta ketelik Japonııada ıadrolyq qarýdy ákelýge tyıym salý máselesi talqylanyp jatyr.
