Japonııa salqyndatqysh áseri bar maska shyǵara bastady
TOKIO. KYODO NEWS. QazAqparat – Japonııanyń birneshe kompanııasy jaz mezgilinde adamdar ózderin jaıly ári qaýipsiz sezinýi úshin salqyndatqysh áseri bar qorǵanysh maska ázirleýdi bastap ketti. Bul týraly QazAqparat Kyodo News agenttigine silteme jasap habarlaıdy.
Japonııada jáne álemniń basqa da elderinde jazda qoldanýǵa bolatyn maskaǵa degen suranys tez ósip jatyr.
Mamyr aıynyń sońynda Mizuno korporatsııasy jeńil atletıkaǵa arnalǵan jáne shomylý kıimin tigýge qoldanylatyn jumsaq materıaldan jasalǵan maskany satýdy bastady.
935 ıen (8,5 AQSh dollary) turatyn ónim úlken tanymaldyqqa ıe boldy. Sonymen qatar, onlaın-satylymnyń alǵashqy kúninde 20 000 danasy satyldy.
Badmınton, tennıs jáne basqa da sport túrleriniń arnaıy kıimin shyǵaratyn Yonex Co. kompanııasy shilde aıynyń basynan bastap quramynda ksılıti bar «Very Cool» materıaldarynan jasalǵan maskany satylymǵa shyǵarady. Ksılıt jylýdy sińiredi. Mundaı materıal badmıntonnan japon quramasyna, sondaı-aq kásibı tennısshilerge arnaıy kıim tigý úshin qoldanylady.
«Koronavırýstan qorǵaý úshin adamdar maskany uzaq taǵyp júretindikten bizdiń tehnologııa paıdalanýshylarǵa, eń bolmaǵanda, ystyq aýa raıynda «salqyn» rejımin ustap turýǵa múmkindik beredi dep úmittenemiz», - dep málimdedi Yonex ókili.
Kompanııa maskany 840 ıennen satýdy josparlap otyr.
Uniqlo jelisiniń operatory Fast Retailing Co. kompanııasy jazda jasalǵan dem alýǵa múmkindik beretin jáne tez kebetin materıaldy qoldana otyryp, maska satýdy bastaıdy.
