Japonııa robottardy ásker qataryna almaq
ASTANA. KAZINFORM — Japonııa Ózin-ózi qorǵaý kúshterinde jańadan áskerdiń jetispeýshiligine baılanysty, JI-men jasaqtalǵan adam tárizdi robottardy qorǵanys salasyna paıdalanýdy zerttep jatyr, dep habarlaıdy Kyodo.
Úkimet pen bıleýshi partııa ókilderiniń aıtýynsha, robottar soǵys qımyldaryna qatyspaıdy, bazalardy kúzetedi, materıaldyq-tehnıkalyq qamtýǵa qoldanylady.
Bolashaqta barlaý jáne qutqarý operatsııalaryna da robottar jiberilýi múmkin.
Jaqyn arada adam tárizdi robottardy paıdalaný boıynsha zertteýler bastalady, baıqaý uıymdastyrylyp, jeke kompanııalar men ýnıversıtetter ázirlegen robottar óz múmkindikterin kórsetedi.
El úkimeti jyl sońynda qorǵanys jáne qaýipsizdik salasyndaǵy negizgi qujattardy qaıta qaramaq, bul rette JI-di keńinen paıdalaný eldiń qorǵanys qabiletin nyǵaıtýdyń negizgi faktory retinde qarastyrylady.
2027 jyldyń sáýirinde bastalatyn qarjy jylyna arnalǵan bıýdjettik jobaǵa qaraǵanda, Japonııa qorǵanys mınıstrligi jasandy ıntellektti Ózin-ózi qorǵaý kúshteriniń basqarý júıesine engizýdi, sondaı-aq kólemdi ǵarysh derekterin taldaý jáne zymyrandardy baǵyttaýǵa kómektesetin «JI-men jabdyqtalǵan taktıkalyq jerserikti» synaqtan ótkizýdi josparlap otyr.
Aıta ketelik Japonııa armııasy qaıta qurylatyny týraly jazǵan edik.
